Lafaek News–Igreja Parokia Balide, domingu (03/04/22), realiza relijiozu liu husi prosesaun no viasakra ho objetivu atu hametin liu tan sarani katólika nia fiar ba jesus iha adventuál koaresma.
Padre Paróku Balide, Graciano Santos Barros, esplika prosesaun ne’e hahu husi Igreja Balide ba UNDIL too foho osan mean no sae ba Xina-Rate hafoin fila-fali ba iha Igreja Balide tuir dalan liga ba jesus nia krus.
Hanesan baibain ita halo viasakra hatudu demonstrasaun fiar katolika ninia ba sira seluk, halo viasakra naruk no badak tama sai iha suku sira atu fiar katolika ninia liga ho jesus nia dala krus ida nee fanu no hametin sarani sira nia fiar hodi hateke ba domingu ramus neebe tama semana santa,”dehan Pe. Graciano ba Lafaek News iha Igreja Balide.
Pe. Graciano esplika, segunda 04/04/2022 to’o sábadu 09/04/2022 estatua rua sei la’o haleu suku lima ne’ebé identifika ona no mos sábadu semana ne’e, sei lori fila ba Igreja Balide hodi selebra Domingu Ramos, tanba ne’e kustume tradisaun relijioza ninian.
Domingu oin mai tama ona festa domingu ramos, entaun sarani katolika hotu tenke selebra subtansia fiar katolika ninia liu-liu selebra Jesus nia terus no mate no moris hias, tanba Saun Paulo dehan Jesus la moris hias karik ita nia fiar la iha folin tan ne’e ita selebra loloos ida neebe fo esperansa ba ita ba futuru. Pe. Graciano esplika.
Obsevasaun jornalista Lafaek News iha terenu nota sarani kuaze atus rua resin maka partisipa iha prosesaun viasakra ne’e no hahú iha tuku 04:00 lokraik no remata tuku 07:00.
Jornalista :Orlando Magno
Editor : Agapito de Deus
