Lafaek News (Lifau)–Prezidente Partidu Demokrátiku (PD), Mariano Assanami Sabino Lopes husu militantes ho aponates PD Oe-kusse kompostu husi sub-rejiaun Pante Makasar, Oesilu, Pasabe ho Nitibe nadodon tomak ba Lifau hodi demonstra apoiu tomak ba kandidatu Prezidente Repúblika periodu 2022-2027, José Ramos Horta iha segundu ronde ba loron 19 Abril 2022.
Assanami hatoo asuntu ne’e iha kampaña abertura ronde daruak iha Lifau Oe-kusse, sábadu (03/04/22), hodi husu apoiantes no simpatizantes Partidu Demokrátiku RAEOA atu hili Ramos Horta iha eleisaun loron 19 Abril 2022 hodi hatuur hikas konstituisaun RDTL iha fatin loos atu hadia instituisaun soberania 4 atu hala’o servisu ba povu iha pprosesu dezenvolvimentu.
Dia 19 Abril ita vota ba Ramos Horta hadia ita nia konstituisaun, hadia ita nia nasaun nia imajen iha mundu, vitoria ba Ramos Horta vitoria ba Timor Leste, vitoria mos ba partidu hotu mai ita hili Ramo Horta,’’ Assanami afirma ba povu Atoni iha Lifau sagradu.
Assanami afirma, povu mak nain ba dezenvolvimentu, nain ba rai doben Timor Leste, iha direitu atu moris iha ambiente ekonomia ne’ebé di’ak, moris iha situasaun ida ne’ebé hakmatek atu ema ida-idak hala’o nia moris ho hakmatek.
Ramos Horta de’it mak bele lori nasaun Timor Leste ba mundu no lori mundu mai Timor liu husi lori investores husi rai liur mai investe atu hadia ekonomia iha rai laran atu loke kampu servisu barak ba joven hotu iha Timor li-liu joven Oe-kusse oan,’’ katak Assanami.
Reprezentante juventude sub-rejiaun Oesilu Ajano Tefa ho idade 20, afirma, distánsia husi Oesilu mai Lifau dook tebes, maibé maske dook tanba domin ba Ramos Horta, Xanana ho rai doben Timor Leste tenke la’o ba oin atu povu Atoni oan tomak partisipa iha prosesu dezenvolvimentu.
Ha’u mai husi Oesilu sub-rejiaun Oesilu ne’e dook tebes, sa’e kareta truck estrada at loos husi Oe-kusse villa too Oesilu, hau mai apoiu Ramos Horta ho avo Xanana ba ukun hodi hadia ami nia estrada iha Oe-kusse laran tomak, katak Ajano Tefa ba lafaek news iha Lifau,
Tefa ho esperansa katak kandidatu númeru 1 José Ramos Horta sei manan absoluta iha RAEOA tomak, tanba Horta ema ida matenek no mundu koñese bele hadia Timor Leste hakat ba ba oin hanesan nasaun sira seluk iha mundu rai-klaran.
Observasaun lafaek news, areadores Lifau nakonu ho povu Atoni kompostu husi sub-rejiaun Oesilu, Nitibe, Pante Makasar ho Pasabe sees malu la di’ak, no eventu kompisiu polítika ba dahuluk ne’e hetan observasaun husi CNE, STAE no seguransa másimu husi PNTL RAEOA.
Jornalista : Abkeha Raihusar
Editor : Agapito de Deus
