Lafaek News–Partidu Libertasaun Popular (PLP), ohin domingo (27/03/) realiza konferénsia nasionál hodi fó apoiu tomak ba kandidatu Prezidente Repúblika Fransisco Guterres Lú Olo iha eleisaun segundu ronde.
Prezidente Partidu Libertasaun Popular (PLP), Jenerál Taur Matan Ruak hateten, konferénsia ne’e importante tanba bele determina sira nia destinu hanesan partidu no determina destinu hanesan nasaun.
Konferénsia ida ne’e determina ita nia destinu hanesan partidu, determina destinu hanesan nasaun, ita boot sira haree saida mak ita atu selu ba maun Marí, tanba ne’e saida mak ita halo, la’o ho nia to’o mate de’it,” dehan Prezidente PLP Jeneral Taur Matan Ruak iha konferénsia nasionál ne’e iha salaun Canosa Haas-laran Dili, Domingo (27/03/2022).
Jeneral Taur akresenta, sira garante katak iha 2023 sira mak kontinua ukun tanba sira iha planu neduni sira lakoi so’e hela, karik soe signifika hanesan halo toos karik la hotu.
Garante katak 2023 ita mak kontinua ukun, tanba saida ! tanba ita iha planu ita labele soe hela ida ne’e, se ita soe hela ne’e hanesan ita halo toos karik la hotu, ema trata ita entaun labele,” informa Nia.
Hodi dehan, se 2023 garante katak koligasaun ne’e sei ba ukun 2022 tenke kompleta.
Ita tenke buka ema ida hanesan Jesus hatene terus para salva ema, ema ida ne’ebé ema trata nia nonok de’it, ema tolok nia nonok de’it, ema insulta nia nonok de’it hanesan Jesus, mak naran Lu-olo,” katak Taur.
Iha fatin hanesan, sekretáriu jerál FRETILIN Marí Alkatiri hateten, husi PLP, Khunto hamutuk ho FRETILIN sei apoiu nafatin kandidatu Lu-Olo ba Prezidente Repúblika.
Ami atu habelar plataforma ida ne’e ba organizasaun oi-oin laos ba partidu politiku sira de’it, organizasoens profesionais juventude feto, bele kandidatura Lu-olo nian sai kandidatura nasionál ba Prezidente Repúblika,” hakotu Nia.
Iha Konferénsia ne’e hetan partisipasaun husi Sekretáriu Jerál FRETILIN Marí Alkatiri, Konselleiru másimu KHUNTO Naimori Bucar, Prezidente Partidu os Verdes no partisipa másimu husi militante PLP inklui koordenadór postu sira.
Jornalista : Juvita dos Santos
Editor : Agapito de Deus
