Lafaek News--Kandidatu Prezidente Repúblika periodu 2022-2027 Laureadu Nobel ba Paz, José Ramos Horta prontu avansa ba ronde daruak no loke odamatan ba kandidatus 15 nia apoiu no fo bem vindo ba partidus polítika sira hotu ne’ebé iha posbilidade hakarak apoiu Horta ba ronde daruak.
Horta hatoo asuntu ne’e liu husi koneferénsia imprensa, iha sede nasional kandidatu José Ramos Horta, tersa (22/03/22) hodi hateten nia parte fó bem vindu ba kandidatu 16 inklui partidu polítikus sira ne’ebé hakarak apoiu iha prosesu eleisaun prezidénsial ronde daruak iha loron 19 Abril 2022.
Kandidatus sira hotu-hotu ho partidus polítikus hotu hakarak apoiu ha’u nia kandidatu, sempre fo bem vindu atu tama iha movimentu boot ida ne’e hodi apoiu kandidatura ha’u nian,’’ Horta afirma.
Premiadu Nobel ba Paz ne’e fundamenta tan katak, iha prosesu demorkasia la’o hanesan ne’e duni, uluk akontese bainhira akontese segundu ronda hetan kontaktus oi-oin husi partidus polítikus sira ho movimentu hotu, tanba ne’e kandidatura José Ramos nia odamatan nakloke ba kandidatus 15 inklui partidu hotu nia apoiu iha eleisaun ronde daruak ne’e.
Iha biban ne’e, Premiadu José Ramos Horta hatoo parabens ba povu Timor Leste tomak ne’ebé fo konfiansa liu husi votus hatudu realidade barak liu kandidatus hotu, maske la liu bareira 50+1 prosentu, maibé agradese tebes ba povu.
Ikus liu kandidatu Prezidente Repṹblika ne’e hatoo agradesimentu boot ba partidu polítikus hotu, kompostu husi CNRT, PST, PSD, ASDT, PDC, PATIFOR ho movimentus oi-oin inklui arte marsial kompostu husi PSHT, IKS, Sete-Sete, Kolimau 2000, ne’eb durante ne’e servisu maka’as hodi apoiu dezde inisiu too eleisaun ho rezultadu demokrátiku, garante paz estabilidade parabens ba hotu-hotu.
Observasaun lafaek news nota iha partidu polítiku rua hanesan Partidu Demokrátiku (PD) no Partidu PDRT deside apoiu ona kandidatu José Ramos Horta hodi avansa eleisaun prezidensial ronde daruak.
Entretantu, iha fatin hanesan, Lider Karizmátiku atual Prezidente Partidu CNRT Kay Rala Xanana Gusmão husu perdaun ba povu tomak atu pasiénsia vota dala ida tan ba Kandidatu Prezidente Repúblika iha ronde daruak ne’ebé sei realiza iha loron 19 fulan Abril 2022..
Husu perdaun ba povu tomak atu pasiénsia vota dalan ida tan ba Ramos Horta iha eleisaun ronde daruak, tanba importante tebes atu tane konstituisaun RDTL ne’ebé ema viola afeta imajen rai ne’e iha mundu la di’ak, ita lakohi nasaun ne’e tama ba ditadura, nassau demokrasia se tama iha ba ditadura ita iha problema boot,’’ katak Kay Rala Xanana Gusmão hafoin partisipa iha konferénsia imprensa iha seded nasional kandidatu José Ramos Horta Aimutin Dili Timor Leste,
Jornalista : Abekha Raihusar
Editor : Agapito de Deus
