Lafaek News–Rezultadu observasaun husi misaun Eleitorál Uniaun Europea nota en-jeral kampañia eleitoral no eleisaun Prezidénnsia 2022, la’o ho kredivál no tranparante, maibé iha kandidatu independente balun hetan apoiu finanseiru no estrutura hosi partidu polítiku resulta la balansu iha kompetisaun festa demokrasia.
Xefe Observadór Misaun Observasaun Eleitorál Uniaun Europeia, Doménec Ruiz Devesa hato’o asuntu ne’e iha konferensia imprensa ne’ebé kona ba deklarasaun preliminar hosi misaun observasaun eleitorál molok pesesu remata, iha Ótel Timor, Dili, Segunda (21/03/22).
Maske kandidatu sira independente maibé balun hetan apoiu hosi partidu polítiku ne’ebé rezulta kompetisaun ne’ebé lahanesan, iha ne’ebé kandidatu balun hetan vantajen finanseiru no estruturál kompara ho kandidatu seluk,” dehan Xefe Observadór Misaun Observasaun Eleitorál Uniaun Europeia Sr. Doménec Ruiz Devesa iha konferensia imprensa ne’ebé hala’o iha Ótel Timor, ohin segunda ne’e.
Tuir Doménec katak, Sekretariadu Tékniku Administrasaun eleitorál (STAE) organizadu ho di’ak tebes ba eleisaun ne’ebé ho kandidatura na’in 16, inklui feto na’in 4, iha momentu agora, misaun ne’e sei kontinua la’o tuir prosesu apuramentu ne’e iha.
Misaun ne’e to’o ona iha país hahu hosi fulan fevereiru klaran atu observa ho forma ida ne’ebé kompletu prosesu eleitorál. Iha loron eleisaun observadór EU 40 resin halo observasaun iha estasaun votasaun 174 resin iha munisípiu 12 no rejiaun administrativu espesial Oecusse- Ambeno.
Kandidadu sira bele hala’o eleisaun sein restrisaun no kampañia hala’o ho dame, ho insidente balun de’it. Paktu dame ne’ebé organiza hosi Komisaun Nasionál Eleisaun (CNE) karik kontribui ba ida ne’e.
Ambiente média pluralista fornese asesu ba opiniaun polítiku oioin. Misaun ne’e observa katak, Radio Televezaun Timor-Leste (RTTL), fornese tempu transmisaun ida ne’ebé gratuita no kobertura editoriál ba kandidatu nain 16 ho dalan neutrál, maibé nia kobertura ba notisia sira konoba kampañia nian la iha balansu. Metade hosi hosi kandidatu sira iha kampañia Facebook ne’ebé signifikativu.
Ami nia observadór sira hatete katak prosedimentu ba votasaun no kontazen hala’o tuir dalan ne’ebé transparante no ho garantia sufisiente,” tenik Doménec
Deklarasaun preliminar hosi Misaun Observasaun Eleitorál UE nian fó sai molok prosesu eleitorál remata, sei iha nafatin etapa importante, inkui rezultadu final no desizaun ba reklamasaun eventual sira, no ekipa hosi Uniaun Europeia mantein nafatin iha país atu observa.
Jornalista : Felisberto Fernandes
Editor : Agapito de Deus
