Lafaek News (Likisá)–Kandidata Independente Prezidente Repúblika, Isabel da Costa Ferreira iha nia komisíu polítika hateten bainhira hetan konfiansa husi povu sei sai prezidente ida mais ativa no besik povu hodi buka solusaun ba kiak-mukit no dezempregu iha rai laran.
Karik ha’u hetan konfiansa husi povu ha’u hakarak hanesan prezidente ida mais ativa i besik povu tanba ha’u haree ita iha 20 anos atu restaura ita nia independénsia mais ita koa’lia nafatin kona-ba liberta povu, ita sei haree didiak atu liberta ita nia an husi ki’ak no terus depende ba ita ida-idak nia esforsu, tanba ne’e ha’u hakarak besik ba povu hodi fó hanoin ba povu halonusa mak sai husi terus no ki’ak liu-liu atu haree ba familia ki’ak sira, familia kbi’it laek sira,” dehan Isabel Ferreira iha nia mini kampania iha suku Vaviquinea, postu Maubara, munisípiu Likisá, domingo (13/03/2022).
Nia dehan, iha nia parte tau atensaun prioridade ba familia kbiit laek sira ne’ebé seidauk hetan oportunidade ba oan sira atu hetan eskola to’o tékniku superiór, ba sira hetan empregu nune’e bele muda nia nia familia, muda mós nasaun.https://lafaeknews.tl/isabel-luta-muda-moris-husi-kiak-ho-mukit/
Ida ne’e mak ha’u hakarak halo karik hetan konfiansa husi povu iha tinan lima ha’u hakarak hamutuk ho povu atu buka solusaun b problema ida ne’ebé mak povu enfrenta,” hakotu Nia.
Iha fatin hanesan, Ekipa vitória munisípiu Likisa Antonino da Silva Pina hateten, sira apoiu kandidata tanba nasaun Timor-Leste iha faze transjerasionál presiza iha momentu ona atu lideransa tuan sira ba lider foun.
Ha’u hanoin importante ita hahú ho lider feto ida bele sai inan ba nasaun tanba durante ne’e ita rona bebeik aman ba nasaun maibé seidauk rona inan ba nasaun, tanba ne’e mak motiva tebes ha’u atu mobiliza ita nia maluk sira atu apoiu ba Kandidatura ida ne’e,” dehan Antonino da Silva Pina.
Aleinde ne’e kandidata mós hanesan ema ne’ebé potensiál iha kbiit no iha familia ne’ebé exemplar neduni fiar katak ezemplu ne’ebé iha bele hatutan ba familia hotu-hotu iha Timor-Leste atu bele muda ema nia mentalidade.
Estadu halo buat barak halo konstrusaun oin-oin mais komunidade nia mentalidade la di’ak nia implikasaun ita nia dezenvolvimentu sei la realiza ho di’ak, entaun nia prinsipiu ida katak hahú husi familia, hadi’a familia karik familia sira mentál di’ak ona automatikamente sira sei kontribui ba dezenvolvimentu nasaun nian,” hakotu Nia.
Jornalista : Juvita dos Santos
Editor : Agapto de Deus
