Lafaek News (Lautem)-Kandidatu Prezidente Repúblika periodu 2022-2027 ho númeru sorteiru 14, José Ramos Horta prontu simu mandatu foun hadia estadu Timor Leste liu husi korrije erros ne’ebé durante Prezidente Repúblika Francisco Guterres Lú Olo halo hodi hatur hikas orden konstitusional liu husi dizolusaun parlamentu nasional hodi realiza eleisaun hikas forma governu hodi kore povu husi ai tarak laran.
Ha’u simu mandatu dizolve parlamentu nasional forma governu foun hodi servisu hamutuk hadia povu kiik nia moris, hadia nutrisaun inan ho labarik sira, dezenvole arte marsial ho arte ritual atu kuda paz ho estabilidade iha rai Timor,” dehan José Ramos Horta iha kompania dahuluk iha kampu futebol Lautem.
Kandidatu númeru sorteiru 14 ne’e, hatoo nia agradesimentu ba movimentus hotu no partidu polítikus sira ne’ebé apoiu durante inísiu deklara kandidatura too ohin loron realiza kampania dahuluk iha munisípiu Lautem la’o ho susesu no husu eleitores sira atu fihir didi’ak kandidatus sira ne’ebé iha kapasidade hodi lori nasaun Timor ba oin no hasai povu husi aitarak kroat nia laran.
Kampañia ofisial kandidatura eleisaun Prezidénsia periodu 2022-2027, José Ramos Horta nian abertura iha kampu futebol (eis asrama 745 ) munisípiu Lautem, eventu polítiku ne’e partisipa husi militantes no simpatizantes besik rihun tolu resin husi partidu CNRT, PATIFOR, PST, PSD, UDT, PDC no APMT no ASDT, inklui movimentus husi Lautem apoiu Horta, kompostu husi MOKATIL, MOTAX, MORAX ho Klibur Tane As Obra Partidu CNRT, veteranus no juventude loriku aswa’in munisípiu Lautem, kampania abertura ne’e hahú iha oras tuku 15:15, no militantes sira balun hamriik iha aihun hodi rona diskursu polítika husi kandidatu ELPR José Ramos Horta, no militantes balun hamriik de’it iha kampun laran no laiha mahon hodi rona kompromisu polítika husi kandidatu númeru 14 ne’e.
Aleinde ne’e, prezidente partidus polítikus hirak ne’ebé marka prezensa iha kampania dahuluk ne’e, Prezidente Partidu Timor Forte (PATIFOR), Prezidente Partidu Sosialista de Timor (PST), Avelino Coelho, Prezidente Partidu Sosial Demokrata (PSD), João Goncalves, sekretariu jeral Partidu Frente-Mudanca, Ricardo Cardoso Nheu, eis prezidente Frente-Mudanca, José Luis Guterres (LUGU), no Prezidente partidu CNRT, Kay Rala Xanana Gusmão inklui reprezentamtes husi partidu polítikus seluk ne’ebé apoiu kandidatura ho númeru sorteiru 14.
Entretantu komísiu polítika kandidatu Prezidente Repúblika ho númeru 14 ne’e hala’o iha kampu futebol 745 Lospalos Vila Munispiu Lautem ne’ebe observa direta husi observador nasional kompostu husi CNE ho STAE no observador internasional, inklui hetan seguransa másimu husi Polísia Nasional Timor-Leste (PNTL) no mos FALINTIL Forsa Defeza Timor-Leste (F-FDTL), no media ne’ebé halo kobertura iha kampañia abertura ne’e kompostu media nasional no internasional balun hodi halo kobertura ba kampania kandidatus Prezidente Repúblika periodu 2022-2027, kalendáriu kampania daruak sei halo iha munisípiu Baukau.
Jornalista : CE. Lautem
Editor : Agapito de Deus
