Lafaek News–Sekretáriu Estadu Komunikasaun Sosiál (SEKOMS), tersa (01/03), konvida Prezidente Interinu Konsellu Imprensa Expedito Ximenes no jornalista senior sira realiza sorumutu hodi koa’lia ho media sira kona-ba kobertura ba kampañia eleisaun Prezidensiál periodu 2022-202, labele interven polítika finanseiru.
Sekretáriu Estadu Komunikasaun Sosiál (SEKOMS), Merico Juvinál dos Reis “Akara” hateten, iha tempu kampañia ema ida-idak sei ba defende sira nia polítika no hato’o nia vizaun, misaun, programa maibé dala ruma ho emosaun no kontente liu, ultrapasa tiha nia limitasaun hodi halo provoka dinámiku konfrontativu.
Entaun ita ne’ebé servisu iha área komunikasaun ita atu halo saida, ida ita funsaun ida ne’ebé ita bele hasa’e ita nia kna’ar peace journalism ne’e, reportajen ne’ebé kredivel, sai fontes ba lialoos no halo balansu. Segundu ita sai ajente informasaun loos no kredivél la’os hanesan mikrofone ne’ebé ema mak utiliza de’it ita,” dehan SEKOMS Merico Juvinál Akara iha nia intervénsaun ba média sira iha Salaun PCM Palasio Governu Dili, tersa(01/03/2022).
Akara informa, SEKOMS hakarak mantein liberdade imprensa, asegura katak konsellu redasaun mak deside atu kobertura iha ne’ebé, labele halo intervensaun politika finanseiru husi kualker parte.
SEKOMS laiha intensaun seluk, sekoms hakarak maka mantein ita nia liberdade imprensa, asegura katak konsellu redasaun maka foti desizaun atu kobertura iha ne’ebé, atu hatun notisia iha ne’ebé labele halo intervensaun politika finanseitu husi sé de’it,” Informa Merico Juvinál Akara.
Enkuantu media nu’udar pilár importante ida iha prosesu demokrasia ida ne’e, dalaruma ema haree ho matan sorin tanba ema la komprende kanál ne’e ho didi’ak.
Más ita rasik ne’ebé husi area media, dalaruma ita rasik la konsolida ida nia kna’ar entaun ema haree ita hanesan komplementer de’it,” katak SEKOMS Akara.
Iha fatin hanesan Prezidente Interinu Konsellu Imprensa (KI), Expedito Ximenes hateten, konsellu imprensa haree katak ikus-ikus ne’e iha tendénsia atu sees husi kódigu étika jornalizmu.
Husi monitorizasaun no avaliasaun ne’ebé ami ekipa halo ba produtu jornalístiku ne’ebé lao durante ne’e, liu-liu hahú iha 15 janeiru tempu ne’ebé prezidente dekreta loron ba eleisaun prezidensiál, ita hanesan media tenke hamriik imparsiál, neutrál,” dehan Expedito Ximenes.
Neduni Konsellu Imprensa hala’o ona diskusaun ho xefe redasaun sira, editór sira ho jornalista sênior sira hodi produz ona mata-dalan ida hodi fó hanoin ba jornalista sira laiha ikatan jurídiku, maibé iha ikatan étika morál atu responde ba profisaun jornalista nian.
Jornalista : Juvita dos Santos
Editor : Agapito de Deus
