Lafaek News–Premiadu Nobel da Paz, José Ramos Horta akompañia hosi Koordenadora Fiar Iha Asaun Realidade (FIAR), Dulce de Jesus Soares, kontinua lori apoiu umanitaria ba familia boot Asosiasaun Halibur Difisiénsia Matan Timor-Leste (AHDMTL) iha Manleuana no vizita haree kondisaun labarik orfonatu sira iha Sentru Miquel Magone Balide Dili.
Iha vizita lori apoiu umanitáriu ne’ebé ekipa FIAR prepara hanesan ropa ba feto hamutuk unidade 70 ba mane 70 no entrega mós hand sanitizer masa kiik 100 ne’ebé oferese hosi Kompañia Sales Luis Lda.
Apoia hirak ne’e entrega direita hosi Premiadu Nobel da Paz, José Ramos Horta akompaña hosi Koordenadór FIAR, Dulce de Jesus Soares ba Diretór AHDMTL, Gaspar Soares ho membru sira iha edifisiu AHDMTL, iha aldeia Lemkari suku Manleuana Dili, tersa (22/02/22).
Eis Prezidente Repúblika períodu 2007-2012 hato’o agradese ba domin boot hosi ekipa FIAR ne’ebé la kolen hodi kari sira nia domin ba grupu no ema difisiénsia no labarik orfonatu no komunidade sira ne’ebé presiza ajuda iha tempu difisil sira.
Agradese tebes bele hamutuk ho ekipa FIAR durante fulan kotuk too mai ohin kontinua halo asaun karidade hodi apoia ruma ruma no aproveita halo enkontru hodi rona ita nia alin no oan sira hosi Asosiasaun Halibur Difisiensia Matan Timor-Leste nia preokupasaun sira,” dehan Ramos Horta.
Iha oportunidaden ne’e, Horta mós halo vizita hodi haree direita kondisaun uma ne’ebé familia boot AHMTL hela hodi aluga de’it komunidade sira nia hela fatin, tanba sira seiduak iha edifisiu no uma permantente, mezmu AHDMTL sosa ona rai privadu iha área Tibar-Liquiça.
Durante vizita, Horta haruka kedas ekipa tekniku sei kompras materiál hanesan, kadeira meza, inklui sosa ventuña (kipas angin) hodi fasilita família AHDMTL bele utiliza hala’o sira nia prosesu aprendizajen.
Iha fatin hanesan, Diretór AHDMTL, Gaspar Soares hato’o agradese ba vizita supreza hosi Premiadu Nobel da Paz Ramos Horta hodi rona preokupasaun difiensia sira nian ne’ebé liga liu ho sira nia direitu atu asesu ba edukasaun, saúde no asesu ba fasilidade públiku sira ne’ebé presiza hetan konsiderasaun hosi parte Governu Timor-Leste.
Iha enkontru Gaspar aproveita oportunidade murak ne’e introdus kona-ba ema ho difiensia iha Timor-Leste hamutuk 38.118 kompostu hosi difiensia matan 14.828, difiensia tilun ka labele rona no labele ko’alia hamutuk 12.511, difiensia motora 7.466 no difisensia pisiko sosiál ka moras mental hamutuk 3.313.
Hosi númeru ne’ebé mesiona maioria familia difiensia barak hela iha área rurál susar no moris terus labele asesu ba edukasaun, saúde, tanba moris vulneravel.
Hafoin introdus, Gaspar mós entrega kedas proposta ba Premiadu Nobel da Paz, Ramos Horta no Lider Istoriku, Kay Rala Xanana Gusmão bele ajuda sira buka doadores hodi halo kontrusaun ba edifisiu no uma eskola ba familia boot AHDMTL iha Tibar.
Entretantu iha parte seluk, Reprezentante FIAR, Dulce de Jesus Martins dehan, apoiu ne’ebé sira oferese labele haree hosi nia valor, tanba sira ofereta ho domin hodi tulun familia AHDMTL.
Apoiu sira ne’e ita oferese tuir nesidade sira ne’ebé ita obserta katak, ita nia familia sira ne’e presiza hanesan ropa ba feto hamutuk unidade 70, ba mane 70 inklui apoiu mós hand santizer ne’ebé oferese hodi parseiru Kompañia Sales Luis Lda,” dehan Dulce.
Eis Ministra Edukasaun ne’e hatutan, foin lalais ne’e sira nia parte mós servisu mamutuk ho Embaixada Xina iha Timor-Leste fahe mós muskiteiru ba komunidade iha área Postu Administraitu Na’in Feto-Dili kompostu Suku Bemori komunidade sira hetan apoiu moskiteiru no roupa balun, tanba area ne’ebá risku ba moras dengue.
Iha selebrasaun loron domin 14 Fevereiru 2022, sira mós konvida Horta hala’o vizita ba Fundasaun AHISAUN, Fatuhada Dili hodi apoia sasán umanitaria hanesan kamiza,kalsa, vistidu no sasán seluk-seluk tan ba labarik defisiensia sira no oferese mós apoiu sasán nesidade baziku no bebidas ba familia sira ne’ebé hein oan no familia sofre moras dengue iha Ospitál Nasionál Guido Valadares Dili.
Grupu FIAR mós foin lalais ne’e hamutuk ho Horta fahe moskiteiru no roupa balun ba komunidade sira iha área Kasnafar, Manleuana Dili hodi hatudu sira nia jestu domin ba Timoran sira.
FIAR nu’udar oganizasaun ida ne’ebé harii hosi grupu feto potensiál sira kada fulan sempre hala’o asaun solidaridade tulun familia kbiit laek sira iha teritóriu Timor-Leste tuir sira nia forsa.
Jornalista : Abeka Raihusar
Editor : Agapito de Deus
