Lafaek News (Railaku)--Koordenador partidu Congressu Nasional Rekonstrusaun Timor (CNRT) munisípiu Ermera, Domingos Lemos Lopes hateten, atu hadia ekonomia Timor Leste atu ba oin no hatuur hikas imajen di’ak iha mundu internasional laiha tan ema seluk só Xanana-Ramos (XARA) mak bele iha matenek hodi hasai povu husik kiak ho mukit.
Loron hirak liu ba depois de konferénsia nasionál, estrututra munisípiu postu too suku ami halo konsolidasaun too iha baze, lia-fuan ne’ebe ami rona husi baze maka Xanana ho Ramos, hili avo Ramos iha 19 de Marsu, hili Xanana iha 2023, tanba ami povu Ermera terus liu ona, povu atu hakmatek iha ekonomia di’ak so Xanana Ramos ukun fila-fali, Ermera lalika dúvida tan,’’ afirma koordenador CNRT munisipiu Ermera Domingos Lemos Lopes iha nia intervensaun iha diálogu premiadu José Ramos Horta ho komunidade aldeia Calampun suku Lihu postu administrativu Railaku, munisipiu Ermera, segunda (21/02/2022).
Domingos afirma, povu Ermera agora matenek tebes, uluk Xanana Gusmao tula liman ba Francisco Guterres Lú Olo sai prezidente Repúblika, maibé munisípiu Ermera la manan maioria, tanba povu Ermera hanoin hela katak Xanana tula sala liman ba ema, agora Xanana Tula liman ba Ramos Horta, ida ne’e mak povu Ermera hakarak.
Durante ami nia konsolidasaun iha baze, militantes husi partidu FRETILIN, PD, Frente-Mudansa afilia mai CNRT, razaun nasaun ne’e iha Xanana ho Ramos Horta nia liman, povu atu moris di’ak, dada investor oi-oin husi rai seluk mai Timor hodi fo servisu ba joven sira hodi hadia sira nia ekonomia,’’ katak Domingos Lemos Lopes.
Koordenador ne’e akresenta tan, CNRT Ermera lakohi Prezidente Repúblika ida hanesan ida agora, Xanana tula liman sai tiha prezidente ikus mai revolta fali desizaun ne’ebé rasik deside, tanba ne’e, CNRT munisipiu Ermera sei esforsu ho rekursu tomak hodi fo mensajen ba povu munisípiu Ermera atu vota ba númeru 14 iha loron 19 fulan Marsu 2022.
https://lafaeknews.tl/horta-husu-populasaun-ermera-tau-matan-ba-kafe-hanesan-jardin/
Povu Ermera matenek ona, uluk CNRT apoiu Lú Olo, Ermera oan barak lakohi vota, tanba la’os ida ne’e mak sira nia hakarak, agora povu Ermera hein atu fo votus maioria absoluta mak José Ramos Horta ho numeru sorteiru 14 iha loron 19 Marsu 2022,’’ Domingos hakotu.
Entretantu, Kandidatu Prezidente Repúblika períodu 2022-2027, ho númeru sorteiru 14, José Ramos Horta hateten, nia parte la dúvida ho populasaun munisípiu Ermera, tanba nia konsidera Ermera hanesan nia rain rasik razaun tempu uluk hela kleur iha postu administrativu Atsabe, no tempu ikus ne’e sempre vizita be-beik munisípiu Ermera.
Ha’u mai iha Railako, Ermera, Letefoho ho Atsabe dala barak loos, iha 28 Novemru ema boot hotu ba Baukau, ha’u mos simu konvite ba Baukau, hau simu konvite rua ida husi Prezidente Repúblika no ida husi Veteranus sira, maibé ha’u deside mai Railaku tanba hau konvite husi administrador hodi partisipa serimonia hasa’e bandeira iha Railako, maske udan boot,
Merkadu oan ida iha kraik ne’eba ha’u mak hanesan kliente barak liur sempre sosa produtu hirak iha ne’ebá, no ha’u lori imi nia kafé too iha Roma ne’ebá fo ba Amu Papa hemu,’’ dehan Horta iha diálogu ne’e.
Horta haktuir, , iha fulan Outrobru liu ba kotuk, nia (José Ramos Horta) ba Roma, lalin kafé lubun ida ba Vatikanu hodi entrega ba Amu Papa no husu Sua Santidade atu hemu de’it kafé Timor, bainhira esplika kona-ba Kafé Timor Amu Papa mós kontente hodi hemu.
Ha’u nia kolega sira hakfodak tanba ha’u lalin fali kafé tama ba palasiu Amu Papa nian, portantu, Ermera hanesan hau nia rain rasik dezde uluk tempu Portuges ami iha Atsabe ne’eba, ha’u Letefoho tuur ho ema nain rua tolu liu-liu katuas sira hodi rona sira nia istória, no ha’u ba halo mós eskola ida iha foho leten mota bandeira ne’ebá,’’ katak kandidatu ne’e iha diálogu aldeia Camalpun Railaku.
Jornalista : Agapito de Deus
Editor : Floriano Soares
