Lafaek News–Kandidatu Prezidente Repúblika ho númeru sorteiru 16, Mariano Assanami Sabino Lopes, hateten sai Prezidente Repúblika la’os tuur de’it iha palasiu Aitarak-laran, nu’udar aman povu nian tenke rona povu nia preokupasaun.
Ha’u sai prezidente la’os prezidente palasiu nian, ha’u sei sai Prezidente ida povu nian, ha’u sei la’o knua sira tuur hamutuk ho inan-aman sira, ho maun alin sira ho inan feton sira, hodi rona imi nia preokupasaun, imi nia hanoin imi nia aspirasaun” hateten iha nia diskursu, hafoin Lansamentu Kandidatu Prezidente Repúblika ho númeru sorteiru 16 iha Tasi-tolu, Domingu (20/02/2022).
Assanami sublina, Palasiu Prezidente sei la sai palasiu liurai nian, maibé palasiu povu nian, tane palasiu Prezidente sei nakloke ba públiku, tanba povu mak hili ema ida sai prezidente hodi tuur iha palasiu, signifika palasiu ba povu tomak.
Palasiu Prezidente sei la sai palasiu liurai nian, maibe palasiu povu nian, tanee palasiu Prezidente, sei nakloke ba publik, Prezidente Republika sei simu no rona, povu nia lian, povu nia halerik, no povu nia aspirasaun sira, atu sai aman la’os de’it ba povu Timor tomak mak ha’u promete bainhira eleitu ba prezidente Republika ha’u sei husik, hau nia funsaun nudar Prezidente Partidu Demokrátiku, hodi tau matan los de’it ba povu,’’ Assanami promete.
Kandidatu ho númeru sorteiu 16 ne’e dehan, povu doben Timor Leste, mudansa no transmisaun, hahú husi agora, labele hein tan, hei tan katak kontinua hanaruk Impase polítika, hanaruk ódiu no vigansa ba malu, hanaruk fila kotuk ba malu, hanaruk fahe malu, hanaruk moris ida susar no kiak, no halo dook liu tan konstituisaun RDTL.
https://lafaeknews.tl/mjmnd-apoiu-assanami-ba-kandidatu-iha-elpr-periodu-2022-2027/
Iha biban ne’e, Assanami enkoraza povu tomak hamutuk ho fuan ho laran ho vontade no domin ba rai doben Timor Leste.
Ita hamutuk mudah rumu polítika, ita Timor, Timor ida ne’ebé maka, huun ida abut ida povu ida rai Timor ida de’it, “Timor ne’ebé maka fraternu, solidáriu, unidu justu, próspru liután, Timor ida ne’ebe respeitu malu ho los no lolos ba konstituisaun RDTL,” Assanami hakotu lia.
Jornalista MG : Azelio da Cruz
Editor : Agapito de Deus
