Lafaek News–Sekretáriu Estadu Komunikasaun Sosíal (SEKOMS), Mericio Juvinal Akara husu media nasionál presiza halo kobertura ba eventu polítiku no diseminasaun informasaun ba povu atu tau aas kode konduta jornalista nian hodi hala’o knaar ho profisionál iha terenu.
Ita hotu hatene katak, iha fulan hirak ikus ne’e intensidade movimentu polítiku iha rai laran sa’e makaas tebes,” dehan SEKOMS Mericio Juvinal Akara liuhusi nota imprensa ne’ebé Lafaek News asesu iha segunda, (14/02/22).
Akara akresenta, Timor oan hamutuk nain 17 mak sai kandidatura forte no disponibiliza ona hodi rejistu sira nia naran iha STAE no haruka ona ba Tribunál Rekursu hodi fiskaliza sira nian legalidade, nune’e bele partisipa ba prosesu eleisaun prezidensiál periódu 2022-2027.
Haree no tetu dinámiku polítiku nasionál ne’ebé maka la’o dadauk ona nu’udar Sekretáriu Estadu Komunikasaun Sosíal hato’o ba maluk jornalista sira hodi asegura no mantein nafatin prinsípiu fundamentu sira tuir Lei Komunikasaun Sosiál nian,” informa Akara.
Enkuantu tenke mantein nafatin prinsipiu fundamentu sira Bazeia ba artigu 4.0 katak labele halo referénsia ho diskriminasaun kona-ba rasa, relijiaun, seksu, moras konviksaun polítika no kondisaunsosiál.
Ne’e refere liubá eventu polítiku kona-ba kandidatura ka kampaña prezidensiál, husu ba jornalista sira atu halo kobertura hodi hatudu imparsialidade, neutru ba simu no fahe informasaun ba públiku,” dehan SEKOMS.
Bazeia ba artigo 20.0, alinea (d), katak fó sai notísia ka opiniaun tuir interese polítiku ka ekonómiku sira maka haruka. Husu ba Jornalista sira, presiza simu no fahe informasaun ho onestu no bazeia ba data no faktu sira iha terenu no Jornalista sira presiza hato’o informasaun ne’ebé kredivel no evita disinformasaun hosi públiku nune’e labele hamosu situasaun inserteza.
Lia fuan ikus, ha’u la haluha hato’o obrigadu barak ba rona-na’in sira, liuliu ba maluk jornalista sira ne’ebé hala’o knaar tuir profisionalizmu bazeia ba Lei Komunikasaun Sosiál iha Timor-Leste,” Hakotu Nia.
Jornalista : Juvita dos Santos
Editór : Agapito de Deus
