Lafaek News--Kazu Tasi-Tolu, eis prezidente repúblika no atual Primeiru Ministru Taur Matan Ruak, sente triste no hirus joven sira hadomi liu arte marsiais kria inimigu ba malu hodi haluha kontribuisaun foin sa’e sira nia ba rai lulik Timor Leste nia estabilidade no paz.
Primeiru Ministru Jeneral Taur Matan Ruak hato’o asuntu ne’e hafoin remata enkontru semanal ho Presidente Repúblika Fransisco Guterres Lú Olo, kinta (03/02/2022) iha Palásiu Prezidensiál bairo-pite Dili Timor Leste.
Ha’u lamenta los, ha’u tristi los, tanba haree ha’u-nia oan foinsa’e sira hanesan ne’e, ita boot sira hatene nasaun ida ne’e sé nian, ne’e jerasaun foun nian, mais ami triste fali jerasaun foun foti nia para riba tun fali ba rai, ne’e ami triste los”, hatete Xefi governu Taur Matan Ruak ba jornalista sira hafoin reuniaun ho Presidente Repúblika Fransisco Guterres Lú_Olo iha Palásiu Prezidensiál bairo-pite kinta 03/02/2022.
Taur haktuir, uluk nia idade 18 partisipa ona iha funu ho Prezidente Repúblika, Francisco Guterres Lú Olo, Kay Rala Xanana Gusmão, maibé joven agora mak halo funu hasoru ne’e haree triste los.
Ami uluk ne’e la matenek barak, situasaun aat liu, mais ami hadomi los Timor, ohin ne’e imi ladun hadomi ita-nia rai apelu boot ida ba foinsa’e sira, bele difensia maibé sivismu, respeitu, edukasaun ne’e importante, entaun favor la bele oho malu, la bele baku malu, la bele tuda malu, iha buat seluk bele halo di’ak ba ema hotu duke tuda malu no baku malu”.
Jornalista : Rita Moniz
Editor : Agapito de Deus
