Lafaek News–Tenente Jenerál Lere Anan Timur esplika, maske maun boot sira fo bensaun ba malu, maibe ida ne’e la hamate ninia vontade atu kandidata aan ba Prezidente Repúblika tinan 2022 -2027 tanba povu sei fo bensaun liu husi votus.
Fiar povu Timor Leste sei fo bensaun ba ha’u rasik,’’katak Lere Anan Timur ba nia simpatizantes no apoiantes sira iha nia rezidénsia Pantai-Kelapa, sábadu (29/01/2022).
Eis Xefe Estadu Maior Jenerál FALINTIL- Forsa Defeza Timor-Leste (F-FDTL), Tenente Jenerál Lere Anan Timur, dehan ukun ne’e fasil bainhira ema hotu hamutuk, maibé sai Prezidente Repúblika atu serbi nasaun, la’os buka riku.
Ha’u hakarak sai prezidente Repúblika la’os atu simu osan, la’os mós atu sai riku maibé ha’u iha de’it hanoin ida atu servi ita nia nasaun tanba hau serbi nasaun tinan 48 resin ona,’’dehan Tenente Jeneral Lere Anan Timur.
Lere, ema ida bele matenek maibé la hamutuk ho ema seluk ne’e susar, uluk luta nain hotu hamutuk hakarak ukun aan, tanba uluk ema ódiu hodi sama Timor-oan no mos inimigu sira na’ok nasaun nia riku soin, tan ne’e sira hakarak ukun aan ona lakohi ema sama no ódiu sira.
Ohin loron Timor-Leste independente ona entaun ema ne’ebé ukun, la bele gasta osan ba ema na’ok ten, baruk ten no mos la bele gasta osan ba ema bosok ten sira, maibe hanesan Timor oan tenke servisu lai mak hetan osan,” nia relata.
Nia sente kontente tanba apoiantes sira la sura kolen tanba apoiante ne’ebé iha prontu servisu voluntáriu ho konsiénsia rasik.
Ha’u la’os matenek liu no ha’u la’os, maibé ha’u dehan ukun militar no ukun polítiku ne’e la difisil, bainhira ita hamutuk se ita la hamutuk ukun sei difisil mai ita,” kandidatuk Lere Anan Timur tenik.
Jornalista :Orlando Magno
Editor : Agapito de Deus
