Lafaek News–Mandor ba kompania ho naran Consórcio Chegue-Rau LG LDA. José Ximenes, informa razaun konstrusaun ba ponte Ailok-Laran la’o tarde, tanba udan la fo fatin ba tékniku sira atu aselera servisu.
Oinsá ponte ne’e atu di’ak lalais, bainhira udan tun sira la servisu, se udan para loron ida rua foin servisu kontinua,’’ haktuir José Ximenes ba Lafaek news iha aldeia Moris ba Dame suku Bairru-Pite, segunda (24/01/2022).
Mandor kompania Consorcio Chegue-Rau LG lda, José informa nia parte sei esforsu ho tékniku sira servisu maka’as atu aselera konstrusaun ponte refere bele finaliza iha tempu badak.
Iha fatin hanesan, Helio da Costa nu’udar motorista, sente lamentavel tebes, tanba ponte AIlok-laran ne’e harii kuaze tinan ida ona, maibé too agora prosesu konstrusaun seidauk remata, la hatene bainhira loos mak publiku bele utiliza ponte refere.
Helio relata, oras ne’e da-daun transportes publiku asesu liu husi dalan alternativu ne’ebe kloot tebes loron ba loron provoka engarrafamentu, komunidade sira deskansa la hakmatek no labarik sira halimar la livre, tanba movimentasaun maka’as iha dalan korta husi PerumNas ba Ailok-laran.
Entaun sira motorista halai dalan ne’ebe klot atu sira movimentasaun la diak dalan macet, han oras no tempu,’’ katak Motorista Helio.
Entretantu, orsamentu ba konstrusaun ponte Ailok-Laran, montante $.24,919,25, durasaun projetu tinan ida komesa konstrusaun husi 2021 sei remata iha 2022 tinan ne’e.
Estajiada : Francelina Amaral
Editor : Agapito de Deus
