Lafaek News–Prezidente Partidu Congresu Nasional Rekonstrusaun Timorense (CNRT), Kay Rala Xanana Gusmao, fo sai rezultadu husi konferensia nasional domingu (23/01/2022), deside apoio premiadu nobel ba paz, José Ramos Horta, liu husi konferensia nasional hodi kandidata ba iha eleisaun prezidensial 2022-20227.
‘’Kandidatu ne’ebé ami deside hili mak doutor José Ramos Horta,’’ afirma prezidente partidu CNRT, Kay Rala Xanana Gusmao, ba konferensista sira iha salaun Oka Osindu Dili, domingo (23/01/2022).
Desizaun apoiu José Ramos Horta avansa ba eleisaun prezidensial 2022-2027, la’os desizaun Kay Rala Xanana Gusmao nian mesak, maibé apoiu husi kuadrus no koordenador inklui estrututra nasional too munisipiu deside unanimidade apoiu José Ramos Horta avansa ba iha eleisaun prezidensial 2022-2027.
Maske, nune’e antes mosu ona rumoris katak, partidu CNRT mos tula liman ba iha eis Sekretariu Estadu Protesaun Sivil, Alexandrino Xavier, maibé desizaun mosu ho rezultadu oin seluk ikus bensaun monu ba iha eis premiadu Nobel da Paz José Ramos Horta.
Iha eventu konferesia ne’e, bainhira Prezidente partidu CNRT Kay Rala Xanana Gusmao, lee sai kandidatu Jose Ramos Horta nia naran, ema hotu haklala ho lian makas iha salaun Oka laran hodi viva José Ramos Horta no viva Kay Rala Xanana Gusmao.
Jornalista : ekipa LN
Editor : Agapito de Deus
