Lafaek News–Prezidente Repúblika Francisco Guterres Lú Olo, husu kompriende Naval FALINTIL Forsa Defeza Timor (F-FDTL), komponente Naval atu servisu maka’as defende soin iha tasi Timor nian.
Lú Olo hatoo asuntu liu husi Xefe Kaza Militar, Antonio Soares da Silva alias Mau-Kalo, Hera hafoin serimonia aniversariu komponente Navál F-FDTL ba dala 20, Kuarta (12/01/2022), hodi dehan imi hotu ne’ebé serbí Timor-Leste hodi defende interese nasaun nian iha Tasi, atu nune’e Timor-Leste no Timor-oan sira bele uza Tasi ba sira-nia moris loro-loron.
Loron ohin ne’e imi-nia loron, imi hotu ne’ebé serbí Timor-Leste hodi defende interese nasaun nian iha Tasi, atu nune’e Timor-Leste no Timoroan sira bele uza Tasi ba sira-nia moris loron-loron”,deklara Prezidente Repúblika Francisco Guterres lu_olo iha nia mensájen aniversáriu Komponente Navál F-FDTL ba dala 20 hatoo liu xefi kasa militar António Soares da Silva “Mau Kalo” kuarta 12/01/2022.
Iha mensajen ne’e xefi estadu afirma, la ’ós de’it ba atividade militár, maibé mós ba atividade ho natureza sivíl, ne’ebé inklui apoiu ba autoridade Marítima nasionál.
Dezafiu boot tebes ida, ne’ebé ita hasoru ohin loron, mak oinsá ita haree ita-nia relasaun ho tasi, dezafiu boot ida-ne’e ezije estadu atu fó prioridade loloos ba tasi ho governasaun di’ak, haree ba dezafiu ne’e, mak labele duplika meius hodi hala’o knaar ida de’it no labele gasta rekursus saugati de’it”,dehan Lu-olo.
Tuir Lú Olo, atu estadu bele afirma ninia soberania no autoridade iha tasi, komponente navál tenke prontu atu hala’o knaar hodi prevene no halakon kriminalidade iha área sira-ne’ebé tama jurizdisaun marítima.
Hodi asegura katak nasaun uza loloos tasi, ita tenke fó ba Komponente Navál organizasaun ida ne’ebé matenek no fleksivel, ho meius ne’ebé modernu. Maibé importante liuliu mak asegura katak ninia rekursus umanus kualifikadu, treinadu no ho motivasaun aas”.
Jornalista : Rita Moniz
Editor : Agapito de Deus
