Lafaek News–Akademista Universidade Nasional Timor Loro sa’e (UNTL), departamentu dezenvolvimentu komunitariu, Julio Aparicio, afirma husu governu atu klarifika orsamentu 2022 ho montante boot, maibé mandatu governu besik remata ona no tinan ne’e mos Timor Leste iha adventure kampania Eleisaun Prezidensial no Eleisaun Parlamentar.
Julio Aparicio husu, oitavu governu konstitusional atu define objetivu OJE 2022, maibé lolos mak atu rekupera ekonomia, maibé maneira oinsa, osan fahe de’it ka, liu husi mekanizmu ruma ne’ebé adekuadu, tanba tinan 2022 ne’e, Timor Leste sei realiza eleisaun prezidensial no eleisaun parlamentar, posibilidade membru governu hotu sei konsentra ba kampania tanba ema ida-idak mai husi partidu polítiku.
OJE 2022 ne’e nia objeitvu atu rekupera ekonomia, karik mekanizmu mak lori ba fahe direta ba povu sira ou, liu husi prosesu ruma, hau hanoin orsamentu boot hanesan ne’e difisil uituan,
Tanba tinan ne’e ita mos sei hasoru eleisaun prezidensial no eleisaun parlamentar, razaun seluk membru governu sira mai husi partidu polítiku tolu hanesan PLP, KHUNTO ho FRETILIN, ba hau hanoin susar atu ezekuta OJE 2022 ba dezenvolvimentu nasionál tuir metas,’ katak Julio Aparicio ba lafaek news iha nia kna’ar fatin foin lalais ne’e.
Hodi dehan, mandatu governu hela de’it tinan ida, se aprova orsamentu ho montante boot, maibé tinan ne’e iha kampania eleisaun prezidensial ho parlamentar, bele mosu deskonfia uza osan povu nian hodi ba halo objetivu partidu nian.
Ho kondisaun tempu ne’ebé iha, povu no sosiedade sivil sira bele deskonfia katak osan sira uza hodi halo manipulasaun ka utiliza ba buat seluk, ba hau governu prepara osan boot maibé tenke bazea ba realidade ne’ebé povu Timor enfrenta, labele realidade la’o oin seluk, ita tau objeitvu oin seluk,’’ Julio sublina.
Akademista ne’e fo ezemplu, husi periodu pandemia covid-19 ne’ebé iha, hatudu mo-mos katak emprezariu Timor-oan barak monu, karik planu governu atu fo oportunidade ba setor privadu involve iha prosesu dezenvolvimentu labele ho mekanizmu ne’ebé hamate fali setor privadu.
Solusaun mak governu tenke define prioridade atu bele koloka OJE ba sasaran, ezemplu hadia edukasaun, saude ho agrikultura no infraestrutura, tenke haree didi’ak tanba agora isu komesa mosu fali virus omicron, ita terlanjur promulga tiha osan ne’ebé montante boot agora atu ezekuta oinsá, hau hanoin ne’e difisil’’ Julio fo hanoin.
Akademista ne’e mos preukupa ho kapasidade oitavu governu konstitusional intermus ezekusaun, maibé nia parte membru governu no parlamentu nasional iha hanoin di’ak ba povu Timor Leste, maibé implementasaun mak sai pergunta boot.
Tanba ne’e governu tenke ezekuta didi’ak kontrola máximu osan ne’e atu osan bele sulin too baze hodi benefisia duni povu, labele beneficial fali grupu kiik ruma no benefisia de’it partidu balun mak bosu, maibé povu kontinua moris iha terus no susar-laran.
entretantu, Hafoin Prezidente Repúblika (PR) Francisco Guterres Lú Olo, tetu klean dekretu kona-ba Orsamentu Jerál Estadu ba tinan 2022, Prezidente Repúblika Francisco Guterres Lú Olo, ho kbiit konstistusionál, promulga diploma n°55/V ne’ebé dekreta husi Parlamentu Nasionál, iha 16 dezembru liubá.
Hafoin tetu klean Dekretu kona-ba Orsamentu Jerál Estadu ba tinan 2022, Prezidente Repúblika Francisco Guterres Lú Olo, ho kbiit konstistusionál, promulga Diploma n°55/V ne’ebé dekreta husi Parlamentu Nasionál, iha 16 dezembru liubá”, hatoo xefi estadu liu husi komunikandu imprensa media Prezidente Repúblika segunda 03/01/2022
Lú Olo afirma, tuir Konstituisaun haruka (liuhusi artigu 115, n°1, alínea d) no artigu 145°, n°1), tinan-tinan, Governu mak iha kbiit atu prepara proposta-Lei refere ba (OJE), governu hato’o proposta-Lei kona-ba OJE 2022 ba Parlamentu Nasionál iha 15 Outubru 2021, ho montante USD 1,675.000.000.
“Tanba deputadu sira aprova proposta foun liu 100 durante diskusaun espesialidade, PN hato’o dekretu kona-ba OJE 2022 ba PR ho montante total liu biliaun rua (usd 2.178.328.791)” PR relata.
Xefe estadu ne’e fundamenta, tuir komunikadu imprensa husi governu, Orsamentu 2022 sei tau matan ba prioridade nasionál neen: 1) dezenvolvimentu kapitál umanu ( edukasaun, formasaun profisionál no saúde);2) abitasaun no inkluzaun sosiál; 3) setór produtivu sira (agrikultura no turismu), ambiente no konetividade; 4) dezenvolvimentu setór privadu; 5) dezenvolvimentu rurál no 6) boa governasaun.
Jornalista : Agapito de Deus
Editor : Felisberto Fernandes.
