HANOIN HIKAS 7 DEZEMBRU-NAKUKUN’75

Husi : Domingos Maia

Epizode da-II

Edifísiu Seminário N.S. de Fátima Dare Rahun-U’ut iha ami leten.

Haree situasaun apertadu liu ona. Housi Tasi tiru kañaun sa’e mai, housi foho Kotolau to’o Manmetalau tiru hasouru tún. Forsa Armada iha kilat-boot ida de’it. Tiru duni musan ida ka rua monu duni iha Tasi-Ibun Alfándega oin nebá, kal la nakfera tan bé dada-mamuk tiha de’it ba Foho.
Ami iha hela klaran, saida la iha. Dalan úniku mak halai tama Kapela hodi reza de’it. Kolega Chico Barreto, Hilário (+) cs sai ba ké ai-farina iha to’os Seminário iha Posto tuan Laulara leten. Haree ba Seminário suar rai-rahun sa’e ona, sira halai saruntu fila, ai-farina sira kal namtate sai hotu iha dalan. Lori de’it mak balun iha kaut-kidun, so’e tiha de’it tama dapur, tuir tama hotu Kapela, hakneak reza.
Ha’u sente la hakmatek ona, konta tersu-musan mós la loos ona. Hamrik, sees tiha, tama fatin-konfesa, Pe. katuas Bernard Guin, SJ nia tuur-fatin hodi atende lorloron konfisaun.
Iha meza-boot ida. Ha’u nia alin Rodolfo, Totó Constantino nia alin no kolega ida tan Hermenegildo Kofitalan nakbelit tuir hotu ha’u. Ami tama tiha ba meza-okos, foti tan kadeira rua tula tan tiha ba meza-leten.

Tersu housik mamar tiha ona housi liman.
Bomba huan nafatin, didi-lolon sira semo sabraut tiha ona; rai-rahun kahur suar housi bomba tama ona ami matan no inus sulan metin ona.
Xinelus sorin-iha ha’u liman-karuk, ida iha ain-loos nafatin.
Ha’u haksoit-sai housi konfesa-fatin, alin na’in tolu mós haksoit tuir. Sai mai, hateke ba Kapela-laran mamuk tiha ona; hateke fali ba altar, meza-leten moos tiha ona no haree rai naroman tiha hotu. Halai fali ba dormitório, haree ba kama-andar sira mak sei hamrik hela; sasaan sira iha Edifísiu-laran rai-u’ut falun-metin tiha ona no hateke rai naroman tiha hotu ona.
Hateke tún-sa’e, la hanoin-naruk tan, ha’u haksoit ona tún murru-hún. Vidro-rahun barak housi janela sira semo katik namkari hotu tún rai-lolon ida. Iha lutu arame-kroat metru-rua haleu. Ha’u haksoit liu, la kona kidun. Ha’u hi’it-sa’e nia ri’in-semente sai tiha, alin na’in tolu dolar tuir sai ba lutu liur.
Hateke tún ba dolar-kuak ida, haree kolega sira seluk, Pe. Reitór no Pe. Espirituál butuk hamutuk de’it iha fatin-klean ida. Iha na’in tolu mak kanek: Kolega Constantino no Hermenegildo de Deus mak kanek-todan, Pe. José Martins, SJ mak kanek kman de’it.
Iha ha’u laran: “Huuum, di’ak liu mak haketak-malu atu evita mate butuk rai-kuak ida!”
Kú alin Rodolfo: “Tuir ha’u mai!”
Hanoin atu koko halai ona ba foho. Maibé ai-han ida la iha, hena mak iha isin-lolon de’it.
Haree ba dapur, sanan-rai ida mak sei tidin hela, kanenok-ulun hamrik hela; refujiadu sira sai hotu tiha ona ba foho.
Ha’u dehan ba alin atu foti sanan ida ho sasoro-labarik nian hela uitoan, ko’us de’it; maibé atu sai, rona fali lian inan ida ho nia bebé sei halerik hela iha dapur-sorin. Alin sei hateke, ha’u bolu: “Eh, mai de’it ona!”

Ha’u dehan tan ba alin atu ba foti netik hena balun atu ba foho karik hodi taka netik isin. Ha’u haruka alin ne’e tan isin-lais, ba raut de’it lensól no hena balun tan, falun hamutuk lori halai mai so’e, ha’u simu tiha iha murru-hún; a’mrua fila, halai tutuir-malu, tesik lós ba rate Santa Cruz.
Sei abrigu hela iha bee-dalan nebé tua-hún boot balun mak haleu tiha. “Seguru, apai!” Sasoro uitoan de’it be alin kal hamlaha lós bé sobak mesak hotu tiha; sanan tidi hela ba tua-hún.

Ha’u hanoin fali: “Ah, atu soe-malu de’it, la di’ak, satán Letfoho de’it mak kanek” Ha’u koko hakat-sai no hafuhu-rai, halai fali ba fatin kolega sira subar ba.

Haree sá kolega Constantino no Hermen hoban-an hela ho raan. Ha’u tauk hela haree raan … Maibé habrani-an de’it atu tukeu kolega Constantino S. nebé isin boot kamada liu ha’u, ha’u sente nia kman loos. Tikeu de’it to’o tiha iha Sr Frascisco Barreto nia uman, iha Sta Cruz, hatoba hela. Kolega Hermen nia ain mak kanek-borus tiha kuak rua, dada de’it. Kolega Amindo Maia mós la’o tuir ho kolega sira seluk to’o besik uma ona, Armindo Maia lamas fali nia matan-fukun sorin, morteiru nia pedasuk ida sei sikat hela tama lós iha kulit matan-fukun sorin-loos, mate-fatin. Nia hakilar: “ó pá, póoosa! Ha’u iha estilasu-rahun pedasuk ida iha matan-fukun, lamas ba, sei manas hela ne’e!” Sukit sai tiha lalais.

Uma-laran klot fatin la to’o ba ami hotu. Nune’e, fó instrusaun atu idak-idak buka fatin estratéjiku hodi ké nia rai-kuak. “Wah, engrasadu tebes!” Balun silu lerek ai-loos hodi ké daudaun rai-kuak, balun nebé la hatene ké rai, kuitadu, sadere lerek ba hás-hún no samtuku-hún sira.

Sira nebé mak konsege ké ona rai-kuak bele helik-an netik ona.
Frabscusco ho Hilário (+) rai-kuak ida: Ké klean tún tiha mak tama fali tan. Seguru!
Akex Araújo ho Norbeto Amaral rai-kuak ida: Ké lós iha ai-hún boot ida; hasouru lós ai-abut boot ida, la fó tan fatin-mamar atu ké tún tan; hada haleu fali rai-kuak ibun ho fatuk sai loloos tiha hanesan bee-matan lulik ida la klean; subar mak isin-lolon, maibé ulun-fatuk rua sai hela hanesan manu-makikit nia oan nurak rua iha knuuk-laran.
Sancho Amaral ké ninian mesak rai-kuak ida; ké tiha hanesan fatin-abrigu militar, hafoin taka fali ho ai no tua-tahan; iha kalan atu han ai-farina maran, bolu Sancho, la hatan; ba buka fali fatin-abrigu, kal sama fali nia ulun mak foin hakfodak hasai lian nú karau: “Wongaeiii! Kolega sira: “Ah, Sancho! Seidauk kona morteiru-musan, ó oho-an tiha de’it ona ne’e!”
Ha’u ho alin, rai-kuak ida: Ké tún lós tua-hún boot ida, rai mamar hela; klean tiha, sena fali tua-fulun mak tún uluk ba. “Waiii, katar para mate, ina!” Hasai tiha troka fali ho ai-tahan seluk.
Armindo Maia mesak rai-kuak ida; kal hetan besi-suak bé ké rai-kuak loloos hanesan iha semitériu-laran. Sorti, kalan udan uitoan bé halai tama tiha uma-laran hamutuk na’i-lulik na’in rua no sira bé kanek: Consta & Hermen.

Iha kalan, mak kaiñaun isin ida tún, rebenta, halo rahun-uut tiha kuda-aman ida no bibi-aman ida, na’in mak kesi hela besik ai-hú no rai-kuak Armindo Maia nian. Dadeer, haree fali rai-kuak taka-metin tiha ona ho rai no balada sira ne’e la soi ida. Armindo Maia hakbesik ba nia rai-kuak, hakfodak: “Opá, pooossa! Se eu estivesse aqui, meu Deus!” Ha’u ho espontáneu: “Ai que boa sorte! Pois, não nos daria muito trabalho, amigo! Bastando uma florinha, quando tiver, para pôr em cima do cemitério e …!” Balun sei hatudu lerek oin hamnasa. Grasa ba Maromak, nia sei moris hela!

Pe. Reitór fó ona orientasaun: “Olhem, salva-se quém poder. Nós (os dois padres) com esta situação, nem podemos garantir mais a vossa vida. A não ser, se queiram … (decidir morrer conosco)!”

Ho ne’e, ha’u hetan ona roman atu deside: “Ba foho de’it! Se mate, sei hamutuk ho maun-alin sira!”
Maibé kokega Armindo deside sai uluk hamutuk nia kolega ida naran Aleixo Espirito Santo (?), Bobonaro oan hotu. Tan kolega Aleixo nia aman militar mak hameno kareta Unimok ida mak mai hasoru sira iha Balibar, Kotolau. Sira sai molok dia 18 Dezembru basá iha loron 18 fulan Dezembru mak ami-nia grupu-boot sai: Estudante sira Agricultor Dare lubuk ida; família Gonçalves ida fee-lain ho oan ki’ik oan rua: Inan ko’us ida ki’ik liu no aman tukeu ida boot uitoan. Hafoin: Akexandre Araújo, Norberto do Amaral (bispo) Ainaro oan hotu; housi Lete-Foho mak Hermenegildo (padre), alin Rodolfo ho sira seluk hamutuk na’in 24 (rua nulu resin haat); no ha’u mak otas tuan liu bé sai organizadór viajen to’o tiha Lete-Foho lori loron haat, kalan tolu iha dalan; no ho tulun grasa-boot Maromak nian, ami bele hakat liu tiha difikuldade barak tutuir kada Posto Seguransa sira iha área Aileu nian.

Ha’u hanoin to’o de’it iha ne’e ona atu konta de’it efeitu housi 7 Dezembru-nakukun’75 no Edifísiu Seminário N.S. de Fátima-Dare rahun-u’ut tiha iha ami leten.

Obrigadu wa’in ba belun lee-na’in sira!