Lafaek news—Ministériu Agrikultura no Peskas (MAP) liuhusi Diretor jeral Peskas, Acacio Guterres no nia komitiva partisipa kongresu internasional husi via online ho tema 7th East Asian Seas ministerial Forum, objetivu atu avalia planu ne’ebé implementadu ona iha tinan ha’at ba kotuk no mós prepara programa ba periodu 2023-2030.
Iha Oganizasaun Intergovenamentál Partnerships in Environmental Management for Seas of East Asia (PEMSEA) organiza kongresu ba dala hitu kona-ba forum ministeriál no programa ne’e la’o ona durante tinan rua-nulu resin ualu, iha ne’ebé Timor-Leste nia partisipasaun iha PEMSEA tinan sanolu resin lima ona.
“Objetivu hosi ministeriál forum ne’e atu halo avalisaun ba planu ne’ebé halo tiha ona durante tinan ha’at ba kotuk no mós prepara programa sira ne’ebé mak atu halo iha tinan 2023 ba to’o 2030,” dehan diretór jerál Peskas Acacio Guterres ba lafaek news hafoin partispa kongesu ministeriál forum iha Timor Plaza, kinta (02/12/2021).
PEMSEA nia aktividade iha Timor-Leste kobre munisípiu tolu mak hanesan Dili, Manatutu no Likisa nia objetivu halo jestaun ba kosteiru sira no asegura biodiversidade iha area kosteiru nian, maibé programa ida halai liu ba oinsa mak oseanu ne’e bele saúdavel, haree ba vida moris komunidade no ekonomia global liuliu iha Timor-Leste.
“Razaun prinispál husi kongresu ministeriál forum mak nasaun sanolu resin rua ne’ebé hamutuk hodi bele fahe informasaun ba programa ne’ebé implementa iha nasaun ida-idak nian. Fahe esperensia sira ne’ebé bele atinje objetivu ne’ebé define ona iha programa ne’e,” esplika nia
Diretór subliña, kongresu ne’e mós iha asina deklarasaun forum ministeriál ho objetivu atu reafirma pozisaun nu’udar parseiru rejiaun nian oinsa atu la’o ba tinan hitu oin mai no bele apoiu programa ne’ebé mak la’o no oinsa mak atu haree ita nia oseanu ne’e saudavel, vida moris ema nian no liuliu mak ba ekonomia ajul ne’ebé atu halo iha tinan hirak mai.
Tuir objervasaun jornalista lafaek news katak nasaun hirak ne’ebé partisipa iha kongresu virtuál ne’e mak hanesan China, DPR Korea, Indonézia, Japaun, Laos, Philipina, RO korea, Singapore, Vietman, Cambodia no Timor-Leste. Uma nain ba kongresu ne’e mak governu Cambodia maibé tanba pandemia covid-19 alternativu mak realiza liu hosi online.
Jornalista : Felisberto Fernandes
Asisten Editór : Pedro de Almeida
