Lafaek News--Diretora Programa Nasionál Dezenvolvimentu Suku (PNDS), Claudina Soares Pinto, informa 2022 PNDS sei halo reabilitasaun ba edefisiu sede suku iha Timor Leste hamutuk 202.
Diretora PNDS hatoo asuntu ne’e iha segunda (09/11), hafoin hasoru malu ho Primeiru Ministru Taur Matan Ruak, hodi atualiza informasaun kona-ba implementasaun atividade uma ba kbi’it laek iha territóriu Timor laran tomak.
Halo uma ba ita nia maluk vulneravel sira ne’ebé koñesidu Uma Kbi’it Laek, infelizmente munisipiu Dili de’it mak halo iha postu rua de’it hanesan Atauro ho Metinaru, munisipiu sira seluk inkliu RAEOA ita implementa hotu Uma Kbi’it Laek iha suku ida, aldeia ida uma tolu, ho totál uma ne’ebé ita konstrui hamutuk 1.254 kazas i 424 aldeias ne’e sei rezulta 2.025 aldeias, entaun ita sei implementa fazeadamente husi 2.025 aldeia se enkuantu ita mantein implementasaun hanesan agora trez kasas para aldeia ida, ita sei fiar katak até 2025 aldeia hotu-hotu sei hetan hotu oportunidade para bele hetan Uma Kbi’it Laek iha territóriu Timor laran tomak,” dehan Diretora PNDS Claudina Pinto hafoin remta enkontru ho Primeiru Ministru iha Rezidénsia PM Faról Dili, segunda (09/11/21).
Diretora PNDS ne’e hateten, implementasaun ba atividade uma kbi’it laek hamutuk 1.254 ba iha suku 424, aldeia 424 ho nia pursentu 55 implementadu ona, falta de’it uma hamutuk 62 mak sei fahe ba faze preparasaun hodi implementa iha faze tuir mai.
Neduni obra hirak ne’e nia kualidade depende ba komunidade sira kada suku no aldeia rasik no mostra husi kualidade Uma Kbiit Laek ne’ebé mak inagura ona iha munisipiu tolu hanesan munisipiu Manufahi, Aileu no Likisa asiste katak iha kualidade ne’ebé mak diak tebes mezmu ke halo husi badaen lokál no garantia katak nia kualidade ne’e tuir duni padraun ne’ebé mak iha.
Enkuantu iha 2021 PNDS hetan osan milioens 38 inklui osan mós adisionál $1.5 ne’ebé hetan husi ministériu finansas atu responde ba kalamidade ne’ebé iha loron 4 Abril, husi orsamentu ne’ebé aloka ba sekretariadu PNDS transfere ona ba konta bankaria suku nian hodi bele implementa atividade prinsipál tolu infraestruturs báziku, reabilitasaun sede suku no atividade Uma Kbi’it Laek.
Tinan oin PNDS propoin para ita kontinua implementa atividades sira hanesan agora dadaun iha Timor laran tomak, suku 452 depois ita kontinua mós halo rehabilitasaun ba sede suku ba 202 suku,” Hakotu Nia.
Jornalista : Juvita dos Santos
Editor : Agapito de Deus
