Lafaek News–Uma Kreda Katólika Timor-Leste, lakon ona lider dioseze Baukau, Dom Basilio do Nascimento hakotu iis iha loron sábadu (30/10/2021), tuku 1 :25 OTL iha Hospital Nasionál Guido Valadares (HNGV) Dili, hafoin semo husi Kovalima mai Dili ho aviaun ZEEMS.
Bispu Dioseze Baukau Dom Basilio do Nascimento antes ne’e iha hela postu administrativu Zumalai munisipiu Kovalima durante loron tolu hahú husi Kinta too ohin sábadu, hodi partisipa iha misa ordenasaun padre nain rua João Guterres no Padre Francisco Indra do Nascimento Tey Seran, derepente atake moras evakua kedan husi Suai mai Dili hodi halo tratamentu iha HNGV, maibé la konsege salva vida.
Biografia
Dom Basilio dó Nascimento Martins moris iha 14 Juñu 1950, nu’udar Bispu Katólika Timorense husi dioseze Baukau, nia moris iha Suai, tuir mai Timor portugés, ikus mai nia muda ba Portugál, iha ne’ebé nia sai Padre fundador iha evora, iha tinan 1977, Nia servisu durante tinan 20 iha Portugál no Fransa molok fila ba uma iha tinan 1994, ne’ebé iha tempu okupasaun Indonézia nia okos.
Dom Basilio do Nascimento sai hanesan Núnsiu Apostóliku ba Dioseze foun Baukau nian iha 30 Novembru 1996 no Titularidade Bispu foun iha 6 Janeiru 1997, Bainhira Carlos Filipe Ximenes Belo reforma, Nascimento sai Administradór Núnsiu Apostóliku ba Dioseze Dili nian, to’o Bispu foun Dili nian, Alberto Ricardo da Silva, introdús iha loron 6 fulan-marsu tinan 2004. Tuirmai, Nascimento sai Bispu ba Baukau.
Iha fulan Outubru tinan 1999, Prezidente Konsellu Nasionál rezisténsia Timorense, Xanana Gusmao, agradese ba Amu-Bispu Nascimento ba apoiu Igreja nian iha luta ba independénsia.
Preokupasaun katak ema rihun ba rihun nia naran lakon durante okupasaun Indonézia nian ba nasaun ne’e sei haluha hodi rekonsiliasaun ho Indonézia, iha loron 21 Janeiru 2006, nia hateten katak rekonsiliasaun ho Jakarta sein Justisa la signifikadu.
Jornalista : Ekipa Lafaek News
Editór : Agapito de Deus
