Lafaek News – Governu liu husi reuniaun Konsellu Ministru (KM), delibera atu propoin ba Prezidente da Repúblika (PR), Fransisco Guterres Lu-Olo, kona-ba renovasaun Estadu Emerjénsia (EE) ba loron 30 tan iha fulan novembru.
Ministru Prezidénsia no Konsellu Ministru (MPKM), Fidelis Manuel Leite Magalhães hateten, hafoin rona aprezentasaun ida husi Sentru Integradu Jestaun Kriza (SIJK) kona-ba Covid 19, ho ida ne’e konsellu ministrus deside atu renova estadu emerjénsia ba loron 30, hahú husi oras 00:00 loron 30 fulan outubru 2021 to’o tuku 23 : 59 loron 28 fulan novembru 2021.
“Neduni iha fulan novembru sei kontinua ho EE maibé medidas ezekusaun depois governu sei ajusta fali ho situasaun iha ita nia rai laran,” dehan MPKM Fidelis Magalhães hafoin remata enkontru KM iha Palasio Governu Dili, kuarta (20/10/21).
Governante ne’e akresenta, modus jerál situasaun mellora, katak aponta ba iha dalan ne’ebé diak liu tan, tanba númeru vasinasaun aumenta, númeru moras mó tun.
“Maibé atu aviza katak ida ne’e seidauk to’o, númeru vasinasaun tenke aumenta, atu garante para ita bele kontinua ho didiak liu tan ho normalizasaun, tanba loron boot mós besik ona,” hakotu Nia.
Jornalista : Juvita dos Santos
Asisten Editor : Pedro de Almeida
