Lafaek News–Oxfam iha Timor Leste husu governu promove prinsipiu uma adekuadu no no haktuir Lei espropriasaun bainhira Implementa re-alojamentu ba Komunidade sira ne’ebe afetada husi Inundasaun iha loron 4 Abril liu ba.
Iha komunikadu imprensa ne’ebe Lafaek News asesu iha tersa (28/09/2021), sita katak Oxfam apresia tebes ho governu nia esforsu hodi dezenvolve ona polítika, no planu atu harii realojamentu ba komunidade afetadu ne’ebé hetan estragu ba uma, rai agríkola no infraestrutura durante inundasaun siklone Seroja iha loron 4 Abríl 2021, no tempu ne’ebé hanesan iha aumenta propagasaun ba moras Covid-19.
komunikadu ne’e haktuir, durante inundasaun Oxfam iha Timor-Leste fó apoiu direta ba Sekretáriu Estadu Protesaun Sivíl, liuhusi diresaun Protesaun Sivíl, atu halo servisu mak efetivu no efisiente hodi fó asisténsia ba komunidade afetadu sira, alende ne’e, Oxfam halo análize legál no hato’o rekomendasaun ba governu hodi konsidera bainhira halo desizaun ba polítika no dezenvolve planu sira atu implementa re-alojamentu.
Ba asuntu refere Oxfam iha Timor-Leste halo ona enkontru ho Diretór Jeral Protesaun Sivil Superintendente Asistente Polisia, Ismail da Costa Babo, Ministru Prezidénsia Konsellu Ministru, Fidelis Leite Magalhaes, Sekretáriu Terras no Propriedade, Mario Ximenes no mós ho Ministru Planu no Ordenamentu no Vice Primeiru Ministru, Jose Reis hodi rekomenda ba Governu katak prosesu re-alojamentu kumpre lei no komunidade nia direitu ba rai liu-liu Lei Espropriasaun nú. 8/2017. Nune’e mós ekipa Oxfam halo enkontru hirak ne’e atu kompriende Governu nia planu ba re-alojamentu no oinsá mak sosiedade sivíl bele kontribui iha prosesu hirak ne’e.
Tuir Governante sira ne’ebé Oxfam hasoru ona, esklarese katak hafoin inundasaun Governu halo asaun imediata hodi mobiliza Governu nia rekursu no apoiu parseiru internasionál hodi responde ba iha kalamidade ne’e, uune’e Governu mós halo ona deklarasaun hodi bandu komunidade sira atu rekonstroi fali uma sira iha área risku hanesan Tasi Tolu no mota ninin sira, atu buka solusaun tempu naruk Governu mós kria komisaun ida atu dezenvolve estratéjia no programa ba harii re-alojamentu. Solusaun ne’ebé komisaun ne’e propoin tenke asesivel, sustentável, no reziliente ba mudansa klimátika no inkluzivu.
Bazeia ba sorumutu ne’ebe hala’o ona ho governante hirak ne’e, Governu identifika ona fatin harii re-alojamentu mak hanesan Hera-Hali Dolar, Metinaru, Beduku, Tibar no Merkadu Comoro, dadus atualizadu husi loron 10 Setembru 2021, ne’ebé akumuladu husi Sekretáriu Estadu Protesaun Sivil (SEPS), hatudu katak iha Dili laran sei iha sentru evakuasaun hamutuk 6 ne’ebé sei ativa, ho uma kain hamutuk 131, ho total membru família na’in 701.
Ho númeru uma kain no membru família ne’ebé ohin loron sei hela iha sentru evakuasaun, tanba sira nia fatin destruidu, nune’e Oxfam rekomenda ba Governu bainhira posivel prioritiza opsaun reabilita uma ne’ebe destruidu duke harii re-alojamentu, liu-liu ba komunidade sira ne’ebé la hela iha area risku. Wainhira laiha ona opsaun seluk no tenke harii duni realojamentu, prosesu sira ba re-alojamentu tenke kumpri prosesu no prinsípiu sira ne’ebé estabelese ona iha Lei Espropriasaun nú. 8/2017.
Oxfam rekomenda ba governu atu sosializa lei sira hanesan Lei Área Protejida no Lei Protesaun Sivíl konaba área sira ne’ebé risku ba hela fatin. Sosializa mós Lei ba Rai nú.13/2017 no Lei Espropriasaun nú.8/2017 atu proteje no asegura komunidade sira nia direitu ba rai no hela fatin, liu-liu ba grupu vulneravel sira mak hanesan feto, labarik, ferik-katuas, ema ho defisiénsia, agrikultór no peskadór sira ho rendimentu ki’ik ne’ebé depende makaas ba rai hodi sustenta moris, wainhira Governu atu implementa re-alojamentu ka sentru akollementu
Ikus liu wainhira Governu harii realojamentu ka reabilita uma komunidade sira ne’be destruidu, Oxfam rekomenda ba Governu atu promove no haktuir prinsípiu hitu kona-ba uma adekuadu tuir padraun internasaional mak hanesan: (1) uma labele karun liu, (2) uma tenke natoon seguru no mós asegura privasidade, (3) uma tenke iha asesu ba oportunidade vida moris no rekursu xave sira, (por ezemplu klínika, merkadu no seluk tan), (4) uma tenke apropriadu tuir kultura ema nian, (5) uma tenke asesivel no entrega la ho diskriminasaun, (6) uma tenke iha asesu ba nesesidade báziku sira (bee moos, hariis fatin, ahi no seluk tan) no (7) estadu tenke rekoñese no fó direitu legal klaru ba ema nia hela fatin hodi sira sente seguru no la bele hasoru despeju arbiru. Remata
