Lafaek News—Komite Central FRETILIN (CCF) hala’o reuniaun iha loron-25 fulan-Setembru tinan-2021 hodi diskuti ajenda importante haat. Ajenda sira ne’e mak: halo ajenda ba Kongresu Nasional Dalima FRETILIN nian; Prorogasaun ba mandatu estrutura nasional no estrutura baze FRETILIN nian; Komfirmasaun ba nomeiasaun membru sira ba Komisaun Nasional Preparasaun no Organizasaun (CNPO) no sira nia mandatu; Fo mandatu ba Sekretariadu Nasional atu inisia konferensia sira iha nivel Postu Administrativu, Munisipiu/Reziaun Espesial sira.
Reuniaun hahu ho aprova ho aklamasaun Komite Central FRETILIN nia deliberasaun ida ne’ebé mak fo Onra no Glória ba Kamarada “Ma’Huno Bulerek Karataiano” nu’udár Fundador FRETILIN, Membru Komite Central FRETILIN Primeira Jerasaun, Sekretariu Komisaun Diretiva FRETILIN no Chefe Konselu Polítiku Militar ne’ebé foin husik Mundu iha loron-24 fulan-Setembru tinan-2021.
Ho Ma’hunu nia mate, Komite Central FRETILIN konsidera “FRETILIN no Timor-Leste lakon elementu importante ida ho grande história nu’udár Eroi Nasional iha Luta Libertasaun Patria nian.”
Tuir mai, Komite Central FRETILIN aprova ho unanimidade deliberasaun ida kona-ba ajendamentu ba Kongressu Nasional Dalima FRETILIN nian ba tinan-2022 ho data ne’ebé sei marka hafoin konsiderasaun no analize ba situasaun nasional.
Komite Central FRETILIN mós aprova deliberasaun ne’ebé halo prorogasaun ba mandatu husi FRETILIN nia estrutura nasional no estruturs baze. Estrutura nasional nia mandatu sei proroga to’o realizasaun Kongresu Nasional enkuantu mandatu estrutura baze nian sei proroga to’o tinan-2024, ho readjustamentu ba estrutura iha fatin sira ne’ebé mak estrutura la ativu.
Nune’e mós, Komite Central FRETILIN aprova deliberasaun ne’ebé komfirma nomeiasaun membru sira ba Komisaun Nasional Preparasaun no Organizasaun (CNPO), ne’ebé halo husi Komisaun Politika Nasional iha loron 19 fulan setembro tinan 2021, hodi koordena FRETILIN nia serbisu preparativu sira ba realizasaun Kongresu Nasional Dalima, Eleisaun Direta Lideransa FRETILIN, Eleisaun Prezidensial tinan-2022 no Eleisaun Lejislativa tinan-2023. Komte Sentral konfirma nomeiasaun husi kamarada Camarada Flávio M. G. da Silva nu’udár Prezidente CNPO hamutuk ho kamarada Cipriana Pereira no kamarada Antoninho Bianco nu’udár Vice-Prezidente.
Deliberasaun ida seluk ne’ebé Komite Sentral FRETILIN aprova mós kona-ba realizasaun konferensia postu administrativu, sub-rejional, munisipiu no RAEOA ne’ebé atu hahu iha fulan-Otubro tinan-2021 ne’ebé sei renova FRETILIN nia estrutura iha nivel sira ne’e no eleje mós delegadu sira ne’ebé sei partisipa iha Kongresu Nasional Dalima FRETILIN nian. Deliberasaun ida ne’e mós fohanoin ba FRETILIN nia organizasaun filliada sira atu hahu prosesu konsolidasaun estrutural iha nivel hotu-hotu.
Hafoin diskusaun profunda ba deliberasaun sira ne’e idaidak, Komite Central aprova deliberasaun ne’ebé fo onra no gloria ba saudozu kamarada Ma’hunu ho aklamasaun
enkuantu deliberasaun haat sira seluk idaidak aprova ho unanimidade.
Atu hakotu enkontru Komite Sentral FRETILIN ne’e iha nia rohan ona, Sekretariu Jeral FRETILIN Dr. Mari Alkatiri hatete, “superasaun ba kontradisaun sira ne’ebé iha mak hetan solusaun no reuniaun ida ne’e importante atu lori Komite Central ba hare hamutuk oinsa mak atu haburas FRETILIN atu bele haburas Timor-Leste.”
“Atu haburas duni Timor-Leste, ita hotu tenki hamutuk serbisu ho determinasaun hodi haboot no haburas FRETILIN hahu husi baze mai to’o nasional, prepara FRETILIN atu manan iha 2023 hodi bele konsolida Estadu de Direitu Demokrátiku, dezenvolve ita nia Povu no konsolida ita nia Nasaun,” Dr. Mari Alkatiri konklui.
