Lafaek News—Governu liu husi Ministériu Justisa (MJ) hamutuk ho terras propriedades prepara ona rai fatin tolu hanesan beduku, hera no tibar hodi hari’i bairu foun ba vítima afetadu inundasaun iha loron 4 Abril liu ba no to’o oras ne’e sei kontinua hela iha lona okos.

Tuir Ministru Justisa (MJ) Manuel Cárceres, hatete, kona-ba re-alokasaun Ministériu kompetente mak sei haree ida ne’e, maibé parte Ministériu Justisa nian mak prepara ona rai fatin tolu ne’e.

“Iha rai ba ita atu halo re-alokasaun ba ita nia maluk sira ne’e no hau nia intensaun ne’e ami lorosa’e ba Hera, loromonu ba Tibar no sira rai klaran ne’e ba Beduku,” dehan Manuel Cárceres ba Jornalista iha Palasio Governu Dili, kinta (23/09/21).

Antes ne’e mos Sekretáriu Estadu Protesaun Civil (SEPC) Joaquim dos Reis Martins, hasoru malu ona ho Xefe Governu Taur Matan Ruak, diskute atu fó solusiona ba komunidade uma kain 131 ne’ebe dadaun sei hela iha lona okos.

“Sira ne’ebé dadaun iha sentru evakuasaun tanba sira nia uma la eziste ona, sira ne’e hela iha fatin risku dezastre nian hanesan iha mota ibun, foho lolon rai halai sobu uma no mota mós sobu uma sira ne’e, uma laiha tanba ne’e mak sira sei iha sentru evakuasaun, neduni ita tenke buka solusaun ba sira se ita fó materiál konstrusaun ba sira hari’i mak sira hari’i iha fatin risku dezastre, ida ne’e mak sei sai ameasa ba sira,” hakotu Nia.

Entretantu vitima inundasaun ne’ebe sei hela iha fatin evakuasaun hamutuk uma kain 131 no membro familia hamutuk 701 kompostu husi sentru evakuasaun 6 mak sei ativu, iha Dom Bosco, iha Manleu Canosa nia kotuk, Rate ain nian, iha Kampo Manleuana nian, iha Hera no iha Restaurante Metiaut nian.

Jornalista     : Juvita dos Santos

Editór         : Pedro de Almeida