Lafaek News–Sekretáriu Estadu Protesaun Sivil (SEPS), Joaquim José dos Reis Martins, informa iha posibilidade akontese fila fali udan boot (laina) liu intesidade normál iha tinan ida ne’e to’o tinan oin.
Ita hetan alerta husi meterolójia Australia nian nomós meterolójia Internasionál katak iha posibilidade akontese fila fali la ñiña, lanina katak udan boot liu intesidade normál iha tinan ne’e to’o iha tinan oin,’’dehan Joaquim ba Jornalista iha Rezidénsia PM Faról Dili, tersa (21/09/21).
Nia dehan, dezastre iha loron 4 Abril nian sai refrensia boot ba ema hotu iha Timor Leste, ne’e duni iha tinan ne’e sei akontese fila fali udan ho intensidade la normal, husu atensaun ba uma kain ne’ebé harii uma iha mota ninin, rai lolon no raihun atu prepara.
Ita aprende ona dezastre iha 4 de abril, agora ita komesa ona halo preparasaun ho ita nia parseiru sira ajénsias nasoens unidas nian, depois ita mós halo sosializasaun ba ita nia fatin sira ne’ebé mak ita identifika hanesan risku dezastre naturais foho lolon sira ne’e ita fó hanoin ba sira no ita mós komesa atu halo aprosimasaun ba fatin ne’ebé ita identifika bele sai hanesan sentru evakuasaun karik iha posibilidade,”
Joaquima argumenta, semana ida ne’e nia laran sei ko’alia ho Ministériu Transporte no Komunikasaun hodi bele servisu besik liutan liu-liu ho meterolójia atu bele fó sai ba públiku kona-ba situasaun klima iha rai ne’e.
Enkuantu iha dezastre foin lalais ne’e Timor Leste husi protesaun sivil hetan apoiu orsamentu husi embaixada Xina ho montante 100 mill no husi kompañia xinesa ho montante 5 mill, hodi uza ba servisu operasionál protesaun sivil atu movimentu iha baze.
Ita hetan apoiu orsamentu husi embaixada Xina ho montante 100 mill no Kompaña Xineza 5 mill, sira ne’e ita uza ba servisu operasionál servisu protesaun sivil nian no ita nia relatóriu kompletu ita sei hato’o fila fali ba entidades sira ne’ebé mak fó sasan sira ne’e mai, laos de’it orsamentu maibé sasan sira hotu ne’ebé mak ita nia parseiru sira fó mai husi ita iha lista kompletu, fahe ba ne’ebé de’it no ita sei relata ba sira sasan sira ne’e ba ne’ebé de’it no to’o iha ne’ebé de’it,” hakotu Nia.
Jornalista : Juvita dos Santos
Editór : Agapito de Deus
