Lafaek News—Primeiru Ministru Taur Matan Ruak, realiza sorumutu ho Sekretáriu Estadu Protesaun Sivil Joaquim José dos Reis Martins, hodi deskute atu solusiona komunidade uma kain 131 ne’ebé afetadu ba dezastre  naturais iha loron 4 fulan abril liu ba, ne’ebé dadaun ne’e sei hela iha lona okos.

Tuir Sekretáriu Estadu Protesaun Sivil Joaquim José dos Reis Martins hateten, sorumutu ida ohin atu update hela ba Primeiru Ministru nia preokupasaun kona-ba komunidade sira ne’ebé oras ne’e sei hela iha tenda, hodi buka solusaun ne’ebé adekuadu ba sira atu bele solusiona maluk sira ne’ebé sei hela iha tenda.

“Primeiru ita tenke halo nafatin mediasaun ho ita nia komunidade ne’ebé mak dadaun ne’e sei iha sentru evakuasaun sira, ita halo aprosimasaun ba sira no sira atu muda ba ne’ebé, se sira hakarak hela ho familia entaun ekipa ba verifika ita fó ajudus ba sira, sira balun hakarak fila ba sira nia munisípiu husi Estatál ba verifika loos duni, entaun ita prepara materiál konstrusaun, ita prepara transporte, ita mós prepara osan ba rai kuadradu atu sira bele muda,” dehan SEPS Joaquim ba Jornalista iha Rezidénsia PM Faról Dili, tersa (21/09/21).

Joaquim akresenta, dadaun ne’e iha sentru evakuasaun 6 mak sei ativu hela, iha Dom Bosco, iha Manleu Canosa nia kotuk, Rate ain nian, iha Kampo Manleuana nian, iha Hera no iha Restaurante Metiaut nian. Neduni sentru evakuasaun sira ne’e totál uma kain 131 no membru familia hamutuk 701.

“Sira ne’ebé dadaun ne’e iha sentru evakuasaun tanba sira nia uma ne’ebé sira hela la eziste ona, sira ne’e hela iha fatin risku dezastre nian hanesan iha mota ibun, foho lolon rai halai sobu uma no mota mós sobu uma sira ne’e, uma laiha tanba ne’e mak sira sei iha sentru evakuasaun, neduni ita tenke buka solusaun ba sira se ita fó materiál konstrusaun ba sira hari’i mak sira hari’i iha fatin risku dezastre, ida ne’e mak sei sai ameasa ba sira,” hakotu Nia.

Jornalista : Juvita dos Santos

Editór      : Pedro de Almeida