Lafaek News–Vítima inundasaun (04 Abril), Maria Fátima Fernandes kontinua hela iha terpal okos, kondisaun isin rua todan no sura de’it loron bebe moris, maibé promesas governu atu estabiliza bairu-foun seidauk serteza.
Ha’u agora hein bebe atu moris, maibé fatin ba ha’u mak araska uituan hodi ha’u bele hela iha lona okos ne’e, bainhira udan bee tama no malirin ha’u no bebe la aguenta fatin ida ne’e hodi hela ba bainhira bebe moris, husu parte kompetente fo netik fatin ida para ha’u bele hela ba, importante ha’u bele seguru ho bebe”, Deklara Maria Fatima Fernandes iha fatin refujiadu Manleuana Kuarta semana ne’e.
Vítima inundasaun sente presaun ba nia an, tanba fatin la seguru, bebe ne’e moris atu hela loos iha fatin ne’ebe, tanba fatin ida da-daun ne’e la seguru udan bee tama no kalan malirin.
Ha’u tur sempre hanoin loron ba loron bainhira bebe moris ha’u atu hela loos iha ne’ebe, tanba fatin ida dadaun hela ba ne’e ha’u senti la seguru ba ha’u no bebe”, tenik Maria ba Jornalista.
Maria Fátima Fernandes ho nia kaben Marito Alves, iha oan hamutuk nain 6 kompostu husi feto tolu mane tolu no dadaun ne’e hein loron bebe ida atu moris.
Iha fatin hanesan Xefe aldeia Lesibutak Alcino Guterres hatutan inan isin rua nain tolu da-dun ne’e hela iha fatin ne’e no ida da-daun ne’e hein loron bebe atu moris, maibe fatin ba sira nu’udar autoridade lokal seidauk hatene atu prepara fatin oinsá.
Nu’udar autoridade lokal seidauk hatene, mediku sira mak hatene tanba durante ne’e mos iha mediku balun mai halo tratamentu ba inan isin rua sira no alin sira ne’ebe mak moras,ha’u lahatene oinsa mak inan ne’e bele hela ho seguru no bebe bainhra bebe moris tanba lona okos mos fatin la seguru,” dehan Alcino.
Entretantu, refujiadu Familia nain 48 dadaun ne’e kontinua hela iha lona okos okupa kampu real madrid tanba uma hetan estragus husi Kalamidade iha fulan abril liu ba.
Hatan preukupasaun ne’e, Primeiru Ministru Taur Matan Ruak hateten harii bairu foun ba sidadaun afetadu ne’ebe mak hetan estragus husi Kalamidade iha loron 4 fulan Abril liuba da-daun ne’e Ministeriu Estatal haree ona dalan.
Primeiru Ministru Taur Matan Ruak hatoo kestaun ne’e hafoin enkontru semanal ho presidente Repúblika Francisco Guterres Lú Olo iha Rezidensia PR Farol kinta ne’e.
Kona ba harii bairu foun ba sidadaun afetadu sira ne’e ha’u hanoin ida ne’e prekupasaun ida ministeriu Estatal haree hela dalan oinsa mak atu fo asistensia ba ita nia ema sira ne’e,” Hateten Primeiru Ministru Taur Matan Ruak iha Residensia PR Farol kinta 16/09/2021.
Xefe governu ne’e salienta, problema fatin sira ne’ebe risku labele admite sirkula ba tanba se la’e ba too iha ne’eba tinan oin fali kontinua dezatre.
Agora atu ita hetan fatin foun ruma ba sira, ita boot sira haree ita nia Dili ne’e boot oinsa, ha’u mai iha ne’e uluk tinan 1973 natar tantu ema iha hotu, ohin loron mak ema nakonu uluk ema ituan deit, entaun ita iha difikuldades barak loos,” Taur dehan.
Enkuantu PM promete, maibé iha kualkuer reformas tenke hetan solusaun ida ne’e ba sira hodi organiza di’ak.
Jornalista : Rita Moniz
Editor : Agapito de Deus
