Lafaek News–Koordenadór Sentru IDP Real Madrid Manleuana, Carlito Esposisionamento informa, iha nia parte la satisfas ho governu nia promesa tanba to’o fulan lima ba ne’en mós governu seidau realiza promesaharii uma ba refuzaidu iha suku Manleuana.
Ami sente susar ba beibeik liu-liu inan feto isin rua (grávida), entaun Sidadaun uma kain 48 ne’e, governu atu lori ba ne’ebe tanba agora udan besik mai ona se estadu laiha osan ona dehan mai ami, nune’e ami bele komprende no buka meius,” dehan Koordenadór Sentru IDP Real Madrid Manleuana Carlito ba jornalista suku Manleuana Dili, kuarta 15/09/2021.
Koordenador Sentru IDP Real Madrid Manleuana ne’e Carlito esplika, refuziadu sira prenxe ona formatu balu husi Ministeriu Estatal nia katak balu hili ba munisipiu no balu nafatin iha Dili, Tan ne’e sira (refuziadu) husu ba governu katak, harii bairo foun ne’e prosesu to’o ona iha ne’ebe?
Konstrusaun la’o ona ka seidauk foundase ne’ebe governu promente mai ami ne’e iha ona ka seidauk no sira ne’ebe ba munisipiu ne’e nain hira no uma kain hira mak estadu atu desloka ba munisipiu inklui sira nia materia oinsa fo osan ka material konstrusaun deit,”Carlito preokupa.
Nia relata, husi Ministériu Estatal hamutuk ho autoridade suku haree ona kos balu ba refuziadu sira atu hela, maibé to’o iha fatin kos sira haree preokupasaun ne’e aumenta barak tanba fatin klot ho medida 3×3, uma kain ida liu nain 10 ne’e atu sulan hamutuk ka?
Governu hatete ona mai ami bainhira ami muda imi ba iha bairo foun ami sei kria kondisaun diak ba ita boot sira tanba merkadu, eskola, ospital no fatin ne’ebe ita boot sira preaiza ne’e sei besik hotu ba imi, maibe sira ko’alia tiha hanesan ne’e to’o agora is la iha ona, la hatene konstrusaun ne’e hahu ona ka seidauk?” nia konta.
Oras ne’e tempu besik ona ba udan, hanesan semana kotuk liu ba udan mai lona sira refuziadu sira hela ba, balu bokon tama liu ba laran, maibé antes ne’e sira fo hatene ona ba estadu katak sira lakohi sai tan vítima ba inundasaun dala 2, maibé durante ne’e kona-ba nesesidade sufisiente tanba kada semana 2 ema sempre ajuda inklui parte governu balu.
Entretantu tuir dadus ne’ebe jornalista Lafaek News asesu, refuziadu ne’ebe sei hela lona okos iha Manleuana hamutuk nain 264 total husi uma kain hamutuk 48 maibe 41 ida mak iha sentru IDP Real Madrid Manleuana no mós uman kain 7 ema hamutuk nain 32 iha Kanosa Manleuana.
Jornalista : Orlando Magno
Editór : Agapito de Deus
