Lafaek News–Estadus Unidus Amerika (EUA) apoiu fundu adisional Dolar Amerikanu Miliaun 1 Ba Timor-Leste kombate Covid-19, no total millaun 5 hodi apoiu ba governu Timor-Leste.
Enkaregadu Negosiu, Embaixador Estadus Unidus Amérika (EUA), Tom Daley, hatete, apoiu ne’e konta mós ho parte husi millaun 4, fornese liu husi inisiativa Covax hodi oferese vasina ba país sira iha mundu tomak.
Osan miliaun 1 neebé ohin ami fó ba Timor-leste nia objetivu atu ajuda no oferese informasaun ba ema sira neebé sei duvida kona ba atu simu vasina,”esplika Enkaregadu Negosiu, Embaxador Estadus Unidus Amerika (EUA), Tom Daley, iha Palasiu das Sinzas Kaikoli, Segunda (13/09/2021).
Estadus Unidus Amérika sente orgullu tebes halo parseria ho governu Timor-Leste hodi kombate covid-19, tanba númeru vasinasaun aas liu kompara ho nasaun sira seluk, maibé ida ne’e la’os too de’it iha ne’e.
Iha fatin hanesan Ministra Saúde, Odete Maria Freitas Belo, dehan, apoiu husi Estadus Unidus Amérika liu husi embaixada iha TL, ne’e hanesan apoiu tutan, iha tinan primeiru Timor-Leste hasoru pandemia ne’e iha ona apoiu lubuk, hanesan hadia infraestrutura no sei prepara hela apoiu balu tan, iha fulan Novembru Timo-Leste sei simu tan apoiu hodi hadia fatin ICU iha Baukau.
Apoiu ne’ebé ohin sira fó ne’e atu haforsa ka atu uza meius organizasaun nian atu halao ita nia servisu hatan ba iha Covid-19, tanba ita la hatene atu hamutuk ho ita ne’e to’o bainhira, tanba ne’e apoiu ida ne’e haree liu ba iha covid-19,”dehan Odete.
Nia hatutan, sira mós sei apoiu kona ba vasina nian, maibé ministerium saúde seidauk hatene vasina ne’ebé mak sira atu apoiu ne’e iha dozes hira, no vasina ida ne’ebé sira atu apoiu nee mak Pfizer, vasina ne’e sei oferese ba ema ho idade 18 ba kraik.
Jornalista : Sandi Belo
Editór : Agapito de Deus
