Lafaek News–Oitavu governu konstitusional lideradu jeneral Taur Matan Ruak, hatoo sentidu kondoensia profundu ba eis Prezidente Repúblika Portuguza, Jorge Fernandes Branco de Sampaio ne’ebé fila hikas ba aman maromak nia kadunan santu.
Lori Governu Konstitusionál VIII nia naran, ha’u-nia naran rasik no ha’u-nia kaben nia naran, ami hato’o kondolénsia kle’an ba família, kolega no belun sira husi Saudozu Eis-Prezidente Repúblika Portugeza, Dr. Jorge Fernando Branco de Sampaio, ne’ebé derrepente de’it fila hikas ona ba ita-nia Aman Maromak Nia Kadunan Santu,’’ afirma PM Taur Matan Ruak, liu husi komunikadu imprensa ba lafaek news iha sábadu (11/09/2021).
Durante mandatu rua Eis-Prezidente Jorge Sampaio nian (husi tinan 1996 to’o tinan 2006), katak Mundu konxiente ba represaun Indonézia, iha tempu ne’ebá aproveita nafatin palku internasionál sira hotu hodi fó apoiu no ativizmu ne’ebé forte ba kauza Timoroan nian iha luta ba Direitu Autodeterminasaun no Independénsia.
Saudozu Jorge Sampaio tama iha istória hanesan Prezidente ne’ebé kontribui tebes ba Restaurasaun Independénsia Nasionál, nia rasik sai hanesan testemuña, nu’udar konvidadu de onra iha serimónia ne’ebé hala’o iha loron 20 fulan-maiu tinan 2002, iha Dili, Timor-Leste no Eis-Prezidente Jorge Sampaio ne’e sei lembra iha mundu hanesan figura importante liu ba kauza sira no ba liberdade, no sei rekoñese nu’udar Timor-Leste no Timor-oan sira nia Belun Boot ida.
Liafuan laiha atu hato’o iha tempu susar no tristeza, bainhira lakon Belun Doben ida. Ita nia pensamentu no orasaun sei hamutuk ho Vosa Exelénsia, Belun doben, Dra. Maria José Rodrigues Ritta, ho Ita-boot-nia família, kolega no belun sira hotu, atu bele iha forsa no fiar nafatin hodi hakat liu momentu difisil ida ne’e,’’ katak xefe governu ne’e iha komunikadu impensa ne’e.
Jornalista : Juvita dos Santos
Editór : Agapito de Deus
