Lafaek News–Loron 10 Setembru 2021,–Estadus Unidus kontente hodi anunsia fundu adisionál millaun $2.3 iha asisténsia, hodi ajuda Timor-Leste luta hasoru COVID-19 no haforsa seguransa saúde nian. Fundu foun ne’e sei uza ba hari’i fasilidade saúde hodi permite ho di’ak liután Governu Timor-Leste salva ema nia moris. Dezde pandemia ne’e hahú, Estadus Unidus servisu ona hamutuk ho Timor-Leste hodi luta hasoru COVID-19, inklui fornese millaun $4 iha asisténsia ne’ebé krítika tebes.
Kompromisu millaun $2.3 ne’e sei fornese finansiamentu hodi hahú servisu ba projetu tolu hanesan Hari’i Fasilidade Izolamentu iha Baucau: hari’i fasilidade izolamentu sira iha ospitál rejional ida iha Baucau ne’ebé sei ajuda trata pasiente COVID-19 no bele hamenus problema iha fasilidade saúde atuál sira Hari’i Unidade Móvel ida ba Kuidadu Intensivu iha Dili: hari’i unidade móvel ida ba kuidadu intensivu iha Dili hodi reforsa Timor-Leste ninia kapasidade atu fornese kuidadu saúde intensivu ba pasiente COVID-19 no populasaun sira seluk ne’ebé ho kondisaun saúde vulneravél; no Projetu Fura Bee Matan iha Batugade: dezenvolve projetu fura bee matan hodi aumenta kapasidade fornesimentu bee moos no saneamentu iha sentru kuarentena ida iha Batugade.
Reprezenta esforsu tomak husi Governu Estadus Unidus hodi apoia Timor-Leste, fundu ne’ebé anunsia iha ohin loron ne’e fornese husi Misaun Estadus Unidus nian iha Timor-Leste, liuhusi Ajénsia Estadus Unidus ba Dezenvolvimentu Internasionál (USAID) no Komando Indo-Pasífiku Estadus Unidus kolabora hamutuk ho Korpu ba Paz. Aspetu sira husi obra ne’e sei halao liuhusi serbisu hamutuk ho UNICEF.
Estadus Unidus hamriik metin ho Timor-Leste hanesan amigu no parseiru duradouru hodi ita hamutuk kombate COVID-19,” haktuir Enkaregadu Negósiu Embaixada Estadus Unidus iha Dili Tom Daley. “Estadus Unidus adopta abordajen abranjente ida hodi hapára pandemia ida-ne’e, halo mitigasaun ba estragu hirak ne’ebé COVID-19 kauza ba ema no sosiedade sira, no reforsa rekuperasaun iha nível globál no prontidaun atu hasoru ameasa kauza husi pandemia iha futuru. Ami kontinua intensifika ami-nia asaun hodi ajuda Timor-Leste atu salva ema nia moris tanba ida-ne’e maka buat loos ne’ebé ami presiza halo.”
Apoiu ohin refleta kompromisu forte Estadus Unidus nian hodi hapára pandemia ne’e. Iha fulan Juñu, Prezidente Biden anunsia katak Estadus Unidus sei fahe doze sira husi ami-nia fornesimentu vasina ba mundu tomak. Estadus Unidus fornese no fahe ona doze vasina besik millaun 110 ba nasaun sira hamutuk 60 – no ne’e foin maka hanesan inísiu deit. Estadus Unidus sei kontinua fornese asisténsia ba Timor-Leste hanesan parte ida husi ami-nia kompromisu hodi lidera resposta iha nível global hasoru pandemia ida-ne’e. (EUA TL)
