Lafaek News—Ministériu Saúde (MS) rejista tan óbitu nain 2, kazu pozitivu covid-19 foun 165 no totál kazu ativu hamutuk: 3.523.
“Totál óbitu iha loron 9 Setembru 2021: 2 (rua),” dehan koordenadór forsas tarefas ba prevensaun no mitigasaun surtu covid-19 iha Timor-leste, Rui Maria de Araújo, liu husi komunikadu imprensa, kinta (09/09/2021).
Koordenadór esplika, detallu liu mane, idade 57, Timoroan, hela iha Dili, vasina kompletu AstraZenecca, iha 1 Setembru 2021, diagnóstikadu iha HNGV, ho sindroma insufisiénsia respiratória aguda (SIRA) tan bá Covid-19, Matebian sofre mós moras diabetes, loron ne’e kedas matebian hala’o tratamentu iha Lahane, no matebian i’is-kotu horiseik loraik, 17h56. Familia kolabora ho ekipa saúde, atu hala’o funeral tuir protokolu ne’ebé adopta iha Timor-Leste.
Nune’e mós mane, idade 66, Timoroan, hela iha Baukau, seidauk vasina, iha 3 Setembru 2021, diagnóstikadu iha Hospital Referénsia Eduardo Ximenes Baukau, ho sindroma insufisiénsia respiratória aguda (SIRA) tan bá Covid-19, matebian sofre mós moras diabetes, ipertensaun no insufisiensia kardiaka, no familia lori matebian mai Dili, hela iha uma deit, Matebian i’is-kotu ohin dader, 06h00, iha uma. Familia seidauk deside atu hala’o funeral tuir protokolu ne’ebé adopta iha Timor-Leste.
Enkuantu, kazu detetatu foun ne’ebé relata iha 9 Setembru 2021: 165 (iha Dili 81, Bobonaro 40, Baukau 20, Aileu 2, Ainaro 5, Kovalima 2, Ermera 1, Manatutu 4, Manufahi 4, Raeoa 5, Vikeke 1, no husi kazu detetadu foun hira ne’e, 27 (16%) iha ona vasina kompletu no 23 (14%) hetan ona vasina doze dahuluk.
“Kazu rekuperadu ne’ebé ralata ohin hamutuk: 271, kazu ativu hamutuk: 3.523, no total kazu konfirmadu kumulativu iha 9 Setembru 2021 (sura husi 21 Marsu 2020): 18.211,” tenik nia.
Jornalista : Sandi Belo
Asisten Editór : Pedro de Almeida
