Lafaek News–Reitór Universidade da Paz, Adolmando Soares Amaral konsidera, governu liuhosi Konsellu Ministru deside hodi estende EE ho Konfinamentu obrigatóriu (KO) laiha vantajen ba povu tanba forma failla presija hamosu forma foun ne’e bele hatan situasaun rai-laran.
“Governu tempu ona atu halo inovasaun ba forma hirak ne’e, la’os ona Estadu Emerjénia, serkasanitaria no komfinamentu obrigatoriu, maibé iha forma seluk ne’ebé bele iha efeitu pozitivu ba povu ida ne’e,” dehan Reitór univeridade da paz Adolmando Soares Amaral via whatsapp, kuarta (01/09/2021).
Lider Universidade da Paz ne’e hatutan, governu laiha razaun atu halo estendimentu bei-beik, maibé tenke hanoin ona atu halo inovasaun ba forma sira ne’e hodi kontra moras ida ne’e. Se governu nafatin estende maka situasaun ne’e sei la iha mudansa tanba forma ida ne’e sira uza ba tinan barak ona maibé lakonseje resove situasaun rai laran ne’e.
Situasaun ekonomia rai laran pior liu ona, liu-liu iha kresimentu ekonomia menus pursentu neen iha 2020 ate agora atinje ona menus pursentu 8.3, ida ne’e atu hatete katak governu ida ne’e la konsege armonija ekonomia mesmu ke nia mai ho polítika rekuperasaun ekonomia atu hasa’e ekonomia, maibé iha realidade rekuperasaun ekonomia ne’e failla
“Maske mai ho forma oi-oin hanesan sesta bázika no seluk tan, maibé la konsege halo rekupersaun ekonomia atu lori ita nia kreximentu ekonomia ne’e hanesan tinan hira liu ba kotuk,” dehan Reitór UNPAZ ne’e.
Adolamando fo hanoin, governu halo forma seluk ida liuhosi polítika seluk ida oinsá bele hasa’e kreximentu ekonomia ne’e hosi tun pursenu 8.3 ne’e sai ba pursentu ida ba leten, forma foun mak hanesan presaun ne’e labele fó fali ba povu, maibé presaun ne’e tenke rigorozu de’it iha fronteira hirak ne’ebé ema asesu tama sai liu dalan ilegal.
Segundu, tenke presaun iha instituisaun sira katak instituisaun sira ne’e mak hakarak halo aktividade nia tenke iha fasilidade hotu atu bele kontra moras ida no hahu autoriza aktividade produtivu iha rai laran tenke la’o, labele sulan povu sira tanba tempu ne’e la’o, povu hakarak aproveita tempu ne’e ho di’ak hodi halo sira nia aktividade.
Ikus prepara fasilidade no halo sensibilizasaun kona ba vasinasaun atu povu bele laran kaman hodi hetan vasinasaun no sosializa ba povu katak saúde iha povu nia liman rasik, maibé bainhira sulan nafatin povu sein alternativa ne’e laiha vantajen ba povu
Jornalista : Felisberto Fernandes
Editór : Agapito de Deus
