Lafaek News—Ohin dia 1 Setembru, Ministériu Saúde (MS) rezista óbitu foun 5, total óbitu 72, no kazu pozitivu covid-19 foun 232, kazu rekuperadu 247, no total kazu ativu 4.480
Tuir koordenadór forsas tarefas ba prevensaun no mitigasaun surtu covid-19 iha Timor-leste, Rui Maria de Araújo, relata, total óbitu iha loron 1 Setembru 2021: 5 (lima), ho detallu hanesan tuir mai; Mane, idade 72, Timoroan, hela iha Dili, seidauk vasina, iha 30 Agostu 2021, diagnóstikadu iha HNGV ho Covid-19 Acidente Vascular Cerebral (AVC) hemorájiku, Matebian i’is-kotu horikalan iha 23h30.
Nune’e mós feto, idade 59, Timoroan, hela iha Dili, seidauk vasina, iha 31 Agostu 2021 diagnóstikadu iha HNGV ho Covid-19 no Acidente Vascular Cerebral (AVC) iskémiku, Matebian i’is-kotu ohin 10h00.
Koordenadór, hatutan, mane, idade 63, Timoroan, hela iha Dili, seidauk vasina, iha 29 Agostu 2021 diagnóstikadu ho sindroma insufisiénsia respiratória aguda (SIRA) tan bá Covid-19, matebian i’is-kotu ohin 12h55.
Iha mós mane, idade 72, Timoroan, hela iha Ainaro, seidauk vasina, iha 30 Agostu 2021 diagnóstikadu iha Ainaro ho sindroma insufisiénsia respiratória aguda (SIRA) tan bá Covid-19, Matebian i’is-kotu ohin, 06h00, molok atu evakua ba ospitál referénsia Maubisse.
Alende ne’e Rui informa, feto, idade 49, Timoroan, hela iha Kovalima, seidauk vasina, iha 29 Agostu 2021 diagnóstikadu iha Kovalima sindroma insufisiénsia respiratória aguda (SIRA) tan bá Covid-19, iha loron ne’e kedas, matebian evacuada liu husi ambulância aeria ba Vera Kruz, Matebian i’is-kotu horikalan 19h15.
Enkuantu familia husi matebian nain 5 kordena ona ho ekipa saúde atu hala’o funeral tuir protokolu ne’ebé adopta iha Timor-Leste.
“Iha loron 1 Setembro 2021, izolamentu Vera Kruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu nain 116, hanesan; kazu Grave hamutuk 16 pessoas (nain 4 uza ventilador, nain 1 uza CPAP Continuous Positive Airway Pressure-, 11 uza oksijéniu), kazu Moderado hamutuk 64 pessoas, no kazu Leve hamutuk 36 pessoas,” dehan koordenadór liu husi komunikadu imprensa, Kuarta (1/09/2021).
Entretantu, kazu detetatu foun ne’ebé relata iha loron 1 Setembru 2021: 232 (iha Dili 169, Kovalima 14, Baukau 12, Lautem 12, Vikeke 8, Aileu 2, Bobonaro 6, Ermera 1, Manatutu 4, Raeoa 4, no Kazu rekuperadu ne’ebé ralata ohin hamutuk: 247, Total kazu ativu ohin hamutuk: 4.480, no kazu konfirmadu kumulativu iha 1 Setembru 2021 (sura husi 21 Marsu 2020): 16.914.
Jornalista : Sandi Belo
Asisten Editór : Pedro de Almeida
