Lafaek News—Grupu Joventude Rejiaun Administrativa Espesial Oe-kuessi Ambeno (RAEOA) liu husi konferensia impresa deklara apoiu tomak ba eis primeira dama, Izabel da Costa Ferreira, kandidata ba Presidente Repúblika iha periodu 2022-2027.
“Ami prontu hodi manifesta ami nia apoiu tomak ba kandidatura Dra. Isabel da Costa Ferreira ba iha eleisaun prezidensiál períodu 2022-2027,” hatete koordenadór Osório Martins Suni, liuhosi konferensia imprensa ba jornalista sira iha restaurante de Doce Tentação Benfica, Dili, segunda (23/08/2021).
Nia hatutan, Joventude RAEOA konsiente katak kustume-at liu iha Timor mak kultura vingativa hodi hamósu problema iha setór-sosiál oi-oin, tan ne’e joventude RAEOA hakarak avansa ho kandidatura indepedente.
“Ho razaun ida ne’e maka ami GRUPU JOVENTUDE RAEOA, hanoin katak, ema ne’ebé atu sai prezidente Repúblika, tenke mai ho kandidatura Independente no tenke feto, maka Dra. Isabel da Costa Ferreira, iha experénsia pasadu hanesan ema ativista ida ne’ebé dezde uluk sempre luta maka’as ba Diretus Humanus,” hetete porta vóz.
Koordenadór ne’e esplika, hateke ba passadu númeru kandidatura ba prezidente repúblika mane maka barak liu, mak okupa, tempu to’o ona atu promove igualdade jéneru iha Timor-Leste. Tamba ne’e husu no apoia Dra. Isabel da Costa Ferreira atu kompete no kompleta hanesan kandidatura independete, atu nune’e bele halo balansu ba númeru kandidatura ne’ebé okupa ho mane.
Nia dehan tan, dala barak liu elege kandidatura sira mai husi partidu politiku sira (parpol), tanba ne’e, desizaun hotu-hotu sempre halis ba grupu ninia interese no la tau aas interese komum ema hotu nian. Aktu hirak ne’e la fó valor ba Demokrasia, la respeita ba herói no Martires ba Libertasaun Pátria sira nia luta no la tau-aas konstituisaun RDTL.
“Maun-alin juventude sira hotu, inan no aman, Rai ida ne’e nia oan tomak, husi Oe-Cusse to’o Jaco, tasi-feto to’o mane, mai ita hamutuk ho fuan ida no lian ida hodi apoiu kandidatura indenpendente Dra. Isabel da Costa Ferreira sem rezerva iha períodu oin mai. Ita hotu presija unidade, tan ho ita hotu nia Unidade, maka ita bele luta ba kauza ida ho efetivu liu tan,” nia imforma.
Jornalista estajiada : Carla Borges / Crisencia Ferreira
Asisten Editór : Pedro de Almeida
