Lafaek News—Governu liu husi reuniaun Konsellu Ministru (KM) propoin ba Prezidente Repúblika (PR), Francisco Guterres Lú-Olo, atu renovasaun estadu emerjénsia ba loron 30 iha fulan setembru nian.

Tuir Ministru Prezidénsia no Konsellu Ministru (MPKM), Fidelis Leite Magalhães, hateten, kauza determinante sira ne’ebé justifika ona deklarasaun estadu emerjénsia no ninia renovasaun sira kontinua mantein, nune’e bele evita no neutraliza risku propagasaun sira husi variante foun SARS-CoV-2 no bele proyek saúde públika no kapasidade resposta husi sistema nasionál saúde nian.

“Hafoin análiza aprezentasaun husi pontu situasaun epidemiolójika nasionál, konsellu ministru (KM) deside atu renova dala ida tan pedidu ba iha Prezidente da Repúblika atu hatuur tan estadu emerjénsia ba iha fulan setembru,” dehan Fidelis ba Jornalista hafoin remata enkontru KM iha Palasio Governu Dili, kuarta (18/08/21).

Governante ne’e hatutan, depois governu halo pedidu ba Prezidente Repúblika no Prezidente Repúblika sei tuir dalan hirak ne’ebé konstituisaun repúblika hatuur kona-ba impozisaun estadu emerjénsia nian, nune’e sei konvoka konsellu sira hanesan, konsellu Estadu (KE) no Konsellu Defeza  no Seguransa, (KDS)  hafoin ida-ne’e sei haruka ba parlamentu Nasionál (PN) hodi fo autorizasaun ba Prezidente Repúblika hodi dekreta.

“Ne’ebé prosesu hirak ne’e ita hatene tanba ne’e prosesu ida Ne’ebé sempre akontese fulan-fulan” hakotu Nia.

Jornalista         : Juvita dos Santos

Asisten Editór : Egidio Nono