Lafaek News–Koordenador Partidu Demokratiku (PD), postu administrativu Dom Aleixo, munisipiu Dili, Julito Soares orgullu ho publikasaun media online Lafaek publika situasaun moris avo Raul da Costa ne’ebe ho ekonomia kritiku.
Koordenador PD postu Dom Aleixo hatoo asuntu ne’e hafoin apoiu material ba konstrusaun ba kbiit laek Raul da Costa hodi konstrui uma foun ba uma kain ne’e.
“Ami Apresia ba jornalista Lafaek news ne’ebé publika kona-ba tiu Raul nia moris, no Material konstrusaun uma ne’e, mai husi maluk nain rua ne’ebé lakohi fo sai identidade, entaun hanesan lideransa garantia Tiu Raul nia uma tenke hanesan sidadaun seluk nia uma,” dehan Kordenador PD Julio ba Lafaek News iha Moris Foun Dili, foin lalais.
Koordenador PD Julito esplika, hanesan Timor-oan sente la kontente, bainhira haree avo Raul nia moris ne’ebe difisil, ne’e sai hanesan responsabilidade moral ida ba sira ne’ebé hamahan aan iha estrutura PD postu Dom Aleixo.
“Ami nia solidariedade ida ne’e fisikamente ami husi ekipa PD mak ajuda konstrui uma ne’e tanba ita haree kondisaun Avo Raul nia la permite atu halo buat hotu, no uma mós la sufisiente atu hela maibé iha tempu besik ami sei entrega uma direita ba Avo Raul,” Julito relata.
Nia afirma, PD rekoñese Avo Raul nia moris la’os presiza de’it mak konstrui uma maibé nia (Raul), sei presiza nesesidade uma laran entaun kona-ba ai han uma laran PD labele promete atu ajuda, maibé karik sira hetan ai-han balu sei ajuda tan nesesidade bazika.
“Karik malu balu sente iha uituan ai-han balu, ezemplu hanesan ita dala ruma loron ida bele han dala 3 entaun ita redus tiha loron ida han dala rua ida fo ba Kbi’it lae sira ne’ebé mak oras ne’e moris susar hela,” Nia rekomenda.
Nia afirma, PD nia atividade halo solidariedade ne’e la’os foin mak hahu maibé besik ona tinan rua hanesan Timor oan, ajuda ida ne’e ho intensaun atu hakmaan sidadaun ne’ebé moris iha susar laran maibé laos ho intensaun seluk.
Iha fatin hanesan Benefisiariu Raul da Costa hatete, sente kontente no orgullu tanba ema laran luak fuan osan mean bele ajuda hadia ona ninia hela fatin ne’ebé durante ne’e haree de’it ai rin mak hamrik.
“Obrigadu barak ba jornalista LN ne’ebé mai buka ha’u hodi fo sai ha’u nia moris iha sira nia media too ohin loron rezultadu mak membru PD halo ona ha’u nia uma, no obrigadu mós ba ekipa Ajensia Empreza Entrga Ba (AEEB), tanba iha loron hirak liu ba sira mós ajuda nesesidade bazika mai ha’u, dala ida tan obrigadu barak ba PD,” Avo Raul Apresia.
Observasaun Lafaek News nia iha terenu katak, uma ne’ebé membru PD halo ba Kbi’it laek Raul da Costa dadaun ne’e too ona porsentu 80 (80%), nune’e mós hafoin halo tiha entrevista ho Jornalista lafaek news, Ekipa PD kontinua halo observasaun ba kbi’it laek ne’ebé moris iha susar laran iha Aldeia moris foun suku Komoro munisipiu Dili.
Jornalista :Orlando Magno
Editor : Agapito de Deus
