Lafaek News–Teodoro Ismaile Ximenes ho 44, da-daun toba de’it iha kama-leten susar atu hakat, tanba sofre moras hafoin reprezenta Timor Leste partisipa iha eventu motor cross iha Atambua Indonézia NTT iha 2007.
“Ha’u hetan asidente iha fulan jullhu tinan 2007 iha Atambua sira fo konvite mai ita Timor Leste entaun ha’u ho kolega lubuk ida mak ba hodi tuir eventu motor cross ne’e mak ha’u monu too ha’u sai tiha hanesan ne’e la’o mos ladi’ak hader mos ladi’ak entaun ha’u tenke bolu ha’u nia oan sira mai kaer ha’u nia liman mak hau hader, ha’u hetan tratamentu maibé kondisaun nafatin la di’ak,” dehan Teodoro ba jornalista lafaek news iha suku akadiruhun iha kuarta 10/08/2021
Nia hatutun, iha tinan 2007 nia hetan asidente nia iha kolega nain rua mak ajuda sosa kadeira roda 2 ba nia hodi uza too ohin loron, maibe agora kadeira roda ne’e mos komesa aat ona, ne’ebé nia labele.
‘’Tanba kursi roda ne’e uza kleur ona nia presiza tebes kursi roda hodi tur wainhira haris,’’ Teodoro husu ho haraik-an.
Teodoro iha oan nain 4 iha feto tolu mane ida feto rua forma ona familia feto ida no mane ida sei klosan, mane boot la kontinua nia estudu tanba nia haree kondisaun aman nian la favorese ona atu buka osan nune’e deside para eskola.
“Ha’u nia oan iha nain haat iha feto tolu mane ida,feto boot no oan segundu forma ona uma kain iha feto ida no mane ida mak sei klosan sira nain rua lakontinua sira nia estudu tamba kondisaun mak hanesan ne’e, ha’u hetan asidente fo-foun ba fulan ida de’it nia inan mos la’o husik tiha sira entaun too ikus mai rezultadu labarik sira la kontinua eskola,” nia hakotu
Jornalista : Domingas Viana
Editór : Agapito de Deus
