Lafaek News— Xefe Suku Interinu Manleuana Antonio Ribeiro dos Santos sujere ba autoridade seguransa matan moris antisipa variante delta, tanba Timor Leste rejista ona tan ne’e tenke kontrola másima hodi evita movimentasaun iha fronteira.
“Husu ita nia seguransa sira tenke kontrola másimu ba Aeroporto no Porto entrada motain Oe-kusse liu liu fronteira Maliana, tanba ita nia populasaun sira sempre hakat liu fronteira hodi tama mai ita ninian rai,” dehan Xefe Suku Interinu Manleuana Antonio Ribeiro dos Santos ba lafaek news iha nia kna’ar fatin Manleuana fóin lalais ne’e.
Nia dehan, virus variante delta ne’e iha ona Timor Leste, tan ne’e autoridade lokál apoiu másimu ba ekipa saúde no parte seguransa sira iha Fronteira atu labele da’et ba populsaun sira.
“Iha fulan kotuk virus Covid-19 mak iha uluk, agora ita rona fali katak variante delta mosu tan ona, ho virus variante ne’e, ami autoridade lokál fó apoiu másimu ba parte saúde no seguransa sira iha fronteira, atu buka dalan para virus ne’e labele da’et mai ita,” infórma Xefe suku interino.
Enkuantu iha biban ne’e autoridade lokál husu ba populsaun sira hakbesik an ba sentru saúde atu bele vasina, tanba vasina maka dalan uniku ba sidadaun hotu para hadok an husi virus Covid-19 ho variante delta no tenke obedese nafatin regras husi goveernu hodi kuidadu saúde públika.
Jornalista : Domingas Viana
Asisten Editór : Pedro de Almeida
