Lafaek News–Nesesidade uma laran obriga Blandina Tunes ho idade 30, iha ne’ebé kondisaun isin rua (grávida), obriga an halo servisu mane nian hanesan pineira rai-henek iha mota Komoro hodi sosa hahan iha uma laran.
Iha kontestu libertasaun povu hamosu diskriminasaun entre ema boot ho kiik, ema polítika sira hariku an no goza ho orsamentu jerál estadu, maske osan ne’e temi osan povu nian, realidade povu kiak nafatin, ema boot sira riku ba nafatin kiak kesi kabun hisik kosar-wen hodi goza ukun an ne’ebé povu rasik mak determina.
Rai-hun mutin hatudu naroman, manu fuik sira hananu hodi hafanu inan Blandina ho kondisaun grávida hadeer husi toba fatin husik hela nia kaben ho oan nain tolu iha kama laran, hakat ba mota laran pineira rai-henek ne’ebé nia kaben Martino halibur ona iha mota laran buak osan atu ba hahán loro-loron nian labele falta.
Inan isin rua Blandina Tunes idade 30 orijen husi suku Bobometo postu administrativu Wesilo Rejiaun Oe-kuse, ho nia kaben Martino Mauno, komesa hela iha tinan 2003 objetivu atu buka moris hodi sustenta nesesidade família nian.
Inan isin rua Blandina Tunes informa, maske ninia kaben (Martino Mauno), lakohi halo servisu todan, tanba Blandina isin rua hela, tanba de’it nesesidade uma laran obriga entaun inan isin rua ne’e obriga aan tenke pinera rai-henek.
“Ha’u nia laen lakohi hau halo servisu todan, maibé ha’u labele husik nia mesak pineira rai-henek, tanba ha’u nia laen agora servisu makas ne’e nia moras tan ne’e maka ha’u isin rua, hein de’it loron ona atu partus de’it ona mos hakarak ajuda buka osan hamutuk nune’e bele sustenta nesesidade uma laran nian,’’ Blandina Tunes ba lafaek News iha nia rezidénsia aldeia Moris Foun foin lalais ne’e.
Blandina relata, Nesesidade obriga, nia sente pinera rai-henek ne’e, di’ak hela hanesan feto ida entaun labele pineira rai-henek too ret ida iha loron ida, maibé too loron rua ho sorin mak inan isin ruan ne’e pineira rai henek hetan ret ida.
“Dadersan tuku 08:00, ha’u tuir katuas oan hakat ba mota laran pineira rai-henek too tuku 10:00 sente loron manas entaun ha’u mai uma deskansa uituan too tuku 02:00 lororaik hahú fali too tuku 05:00, maibé dala ruma kalan mos ami pineira bainhira osan laiha loos ona iha ami nia liman,” ho laran triste nia konta ba Lafaek News.
Inan-Isin rua ne’e esplika, sira pineira rai-henek la’os foin hahú, maibé sira hala’o atividade ne’e besik ona tinan 10, tanba atu sustenta nesesidade uma laran garantia de’it husi pineira rai henek la’os husi servisu di’ak ruma.
“Bainhira ha’u nia katuas oan moras entaun ha’u haruka ema seluk mak tula rai-henek ne’e depois selu fali osan $.5 ba ema sira ajuda ha’u, rai-henek ne’ebé ami pineira iha tipu rua ida nomor satu, rai henek halus ninia presu máximu $.20 mínimu $.18, nomor dua mak rai-henek kasar ninia presu máximu $. 15 mínimu $.12, bainhira ema sosa rai-henek ami foin sosa hahán no fo osan ba oan sira sosa material eskola nian, maibé ami atu rai ne’e laiha tanba ami uza ba uma laran nia mos dala ruma la too,’’ haktuir inan isin rua ne’e.
Iha fatin hanesan Blandina nia kaben Martino Mauno (37), hatete, ihga nia parte lakohi nia espoza halo servisu todan tan nia ferik oan hein de’it ona loron atu partu,maibé Martino nia fen lakohi haree Martino mesak servisu.
‘’Ami haree tuir ami nia moris loron-loron tanba ami ba buka servisu iha kompañia sira mos la hetan entaun ami hanoin tenke halo netik servisu ida hodi sustenta nesesidade uma laran, tanba ne’e mak ami deside pinera rai-henek ne’e, ha’u nia ferik oan mos sempre ajuda ha’u pinera rai henek, maibé ha’u lakohi nia ajuda ha’u tanba servisu ne’e la’os feto nian, tanba servisu nee todan, maibé nia sente la di’ak bainhira ha’u mesak servisu tan ha’u mos halo servisu todan liu ne’e moras kedas,”Martino esplika.
Nune’e mos sira iha oan nain lima 5 nain tolu eskola ona nain rua mak seidauk eskola tanba idade sei kiik, sira hela de’it iha mota ninin tanba iha ema laran luak balun mak oferese rai ba sira halo uma hodi hela provizoriu atu buka moris.
Jornalista : Orlando Magno
Editor : Agapito de Deus
