LafaekNews-Prezidente Repúblika, Franciaco Guterres, Lu-Olo, hato’o mensajen ba konfisaun husi musulmanu kona-ba komemorasaun loron idul adha ne’ebe akontese iha loron ohin 20/jullu/2021iha Timmor-Leste no Mundu tomak.
Maun, bin no alin sira husi Konfisaun Musulmana!
Idul Adha hanesan loron ne’ebé iha signifikadu bo’ot tebes ba komunidade musulmana sira hodi selebra, la’ós de’it iha Timor-Leste maibé iha mundu tomak, Idul Adha fó sentidu bo’ot tebes ba komunidade musulmana iha Timor-Leste no iha mundu oinsá halo sakrifísiu, no momentu ida ne’ebé hasa’e Ita-Boot sira nia fiar ba ALLAH, hodi hametin relasaun entre ema ba ema no hasa’e kualidade moris liuhosi asaun sosiál sira.
Sakrifísiu ne’ebé komunidade musulmana halo iha loron importante ne’e mak sosa no oho animal sira hanesan bibi no karau hodi fahe ba maluk sira ne’ebé presiza, liuliu ba sira ne’ebé susar hetan aihan iha moris lorloron nian. Atu ida ne’e hasa’e liután Ita-Bo’ot sira nia asaun konkreta hodi hakaat ba dalan foun moris nian ne’ebé nafatin mai ho valór fiar ba relijiaun, unidade, fraternidade no sentidu solidariedade.
Estadu Emerjénsia nafatin eziste enkuantu moras Covid-19 fó ameasa ba vida umana iha Timor-Leste. Iha momentu ida ne’e, ita nia maluk barak mak presiza tebes tulun ka apoiu. Iha loron sakrifísiu ida ne’e ha’u fiar metin, katak Ita-Bo’ot sira sei hatudu nafatin sentidu solidariedade ba maluk sira ne’ebé vulnerável liu hodi hasoru situasaun ida ne’e.
Nune’e, ha’u aproveita oportunidade ida-ne’e atu hasa’e liután valor hirak ne’ebé komunidade musulmana kaer metin iha selebrasaun ida ne’e: solidariedade, jenerozidade no karidade ba ita nia kompatriota vulnerável sira. Valor sira-ne’e boot no as tebes ba koezaun nasionál no sosiál tamba lori ita timoroan sai ema ida de’it no Povu ida de’it.
Ohin loron Ita-Bo’ot sira, nu’udar timoroan hatudu sentimentu forte no nakonu ho valores husi ita Ita-Bo’ot sira nia krensa hodi halibur malu ho hafahe ba ema hotu-hotu nu’udar sinál umanu.
Serimónia ida ne’e ho nia solenidade rasik ne’ebé ha’u respeita no sai testemuñu ba timoroan nia espiritu toleránsia relijioza, katak ita hatene simu malu, ita respeita ida-idak nia fiar, tuir Konstituisaun Repúblika Demokrátika Timor-Leste haruka.
Ha’u hasa’e valor hirak ne’ebé relijiaun musulmana tane no hametin no ha’u fiar katak ita hotu sei haburas no haklaken babeibeik espíritu toleránsia no konvivénsia relijioza ida ne’e iha ita nia Nasaun Timor-Leste.
Nu’udar Prezidente Repúblika, ha’u sei tane as nafatin valor sira ne’e no, hamutuk ho Ita-Bo’ot sira no komunidade relijioza sira seluk, ita hotu sei fó liman ba malu nafatin nu’udar Povu ida de’it hodi serbí ita nia Rai doben Timor-Leste.
Ho Estadu tomak no ha’u nia família nia naran, hato’o ami-nia felisitasaun klean ba Ita-Boot sira.
Obrigado barak!
Media PR.
