Lafaek News(Aileu)–Estimulu empriendedorizmu sosiál juventude suku mak oportunidade ba dezenvolve kapasidade juventude nian no haboot kapasidade empriendedorizmu
Asuntu ne’e hato’o husi Sekretáriu Estadu Juventude Desportu (SEJD) Abrão Saldanha, iha diskursu ba lansamentu Nasionál ba ho tema, programa istimulu empriendorizmu sosiál ba juventude suku, iha suku Aisirmou, Postu administrativu Aileu-Vila, Munisípiu Aileu, 15/07/2021.
“Programa no komitmentu ida ne’ebé mak VIII Governu Konstitusional iha ba joven sira mak atu lori joven sira ba hala’o atividade produtiva hodi kontribui ba dezenvolvimentu ekonómika, no kontribui ba prosesu rekoperasaun ekonómika ne’ebe governu hala’o dadauk iha teritóriu tomak,”dehan SEJD, Abrão Saldanha
Govenante ne’e hatutan, Programa Estimulu Empriendedorizmu Sosiál Juventude Suku sei fo espasu ba joven Timor oan sira, atu explora sira nia poténsia no expresa sira nia kapasidade nu’udar forsa kreativa ida ne’ebe bele kontribui ba komunidade no nasaun nia dezenvolvimentu ekonomia no sosiál.
Vantajen demografika ida ne’ebé Timor-Leste iha besik 7596 husi populasaun ho idade menus husi tinan 35, VIII Governu Konstitusional konsiente katak realidade ida-ne’e oferese poténsia no oportunidade boot ba ita nia dezenvolvimentu.
Lansamentu ba programa estimulu emprendedorizmu sosial juventude suku ohin mai husi governu nia rekoñesimentu katak joven sira iha papel importante iha ita nia dezenvolvimentu sosio-ekonomiku no mos governu nia hakarak atu joven sira bele hare ida ne’e hanesan oportunidade ba moris no oportunidade ba dezenvolve sira nia kapasidade emprendedorizmu, dehan SEJD
“Ha’u apela ba ha’u nia maluk joven sira iha Timor-Leste laran tomak atu hakbesik an ba centru juventude sira iha imi ida-idak nia munisípiu, aproveita oportunidade no rekursu ida-ne’e ho di’ak atu hatudu katak ita joven sira ajente kreativa ne’ebé iha kbiit duni atu dezenvolve ita nia rai doben Timor-Leste,” tenik SEJD
Iha fatin hanesan, Adjuntu Administradór Munisípiu Aileu, Felix Maria de Oliveira, hateten, nia parte apresiza tebes ho programa ne’e hodi bele hakma’an governu lokál hodi mellora di’ak liután juventude poténsia.
“Hanesan autoridade lokál ami depozita ami nia konfiansa tomak ba centru juventude sira para sai hanesan akumuladór ba juvenutude sira ne’ebé durante ne’e diskriminadu hela ba prosesu tomak nasaun nian,”dehan Adjuntu adminitradór.
Iha atividade produtiva kompostu husi área agrikultura, asesu ba merkadu, formasaun kona-ba produtividade, dezenvolvimentu no promosaun fatin turistiku no konservasaun meiu-ambiente
Serimonia lansamentu programa Iha lansamentu ne’e partisipa husi governu lokál Munisípiu Aileu, membru Parlamentu, reprezentante PNTL Aileu, no-mos manajer jenerál empriendorismu sosial suku nia husi husi Munisípiu 13 inkluí RAEOA
Jornalista : Egidio Nono
Editór : Agapito de Deus
