Lafaek News (Aileu)–Sekretáriu Estadu Juventude no Desportu (SEJD), Abrão Saldanha, apresiza inisiativu grupu Era Ulun Moris Foun (ERMOF), ne’ebé harii iha 2017, dezenvolve setor ortikultura hodi hetan rendimentu ba nesesidade uma laran no husu joven sira atu banati tuir ezemplu husi grupu ERMOF AIleu.
Koordenadór grupu Eru Ulun Moris Foun (ERMOF),Miguel Muzinho, informa durante tinan barak sira nia familia barak susar tebes atu hetan ekonomia uma laran ne’ebé sufsiente, maibé ho inisiativa ne`e joventude sira halibur hamutuk hodi kria grupu ida-ne’e kompostu hosi ema na’in 13, hodi tau osan kada ema $ 25 too ohin loron.
“Ami harii grupu ne`e iha 2017 too ohin loron no rekolla ona osan hamutuk 20 mill,” informa Miguel Muzinho ba jornalista iha iha Mantane, Aileu, Kuarta (14/7/2021).
Nia hatutan, osan ne’ebé sira hetan liu husi rezultadu kuda modo ne’e sei fó fali ba sira nia membru sira iha grupu laran, hodi sosa material produsaun sira hanesan tanke tau bee, irigasaun no sosa trator.
Hatutan nia, kona-ba produtu ne’e, seidauk tama Covid-19 semana ida sira bele hetan $ 200 too 400, maibé agora iha situasaun Covid-19 labele hetan osan tanba modo sira ne’e fan barak liu ba merkadu públiku no halo parseiru ho loja agrikultura nune’e labele kontinua tanba ho situasaun covid-19.
Modo ne’ebé grupu ortokultura ne’e kompostu husi mós kobi, mostarda mutin, no mostarda metan, no seluk tan kuaze ektares tolu resin.
Iha fatin hanesan, Sekretáriu Estadu Juventude no Desportu (SEJD) Abrão Saldanha louva ho inisiativa juventude grupu ERMOF, ne’ebé kria rasik servisu ba an rasik.
“Ha’u apresia ba joven na’in 13 ne’ebé foti inisiativa ba vida agrikultura, tanba sira balu lisensiadu iha universidade área agrikultura nian no balun iha ne’e nanis, organiza malu hodi halo atividade kuda modo hodi rezolve ona sira nia nesesidade,” dehan Abrão.
Ho inisiativa ne’ebé joven hirak ne’e iha, fó ezemplu ba joven hotu tenke iha inisiativa hodi kria servisu ba an rasik no bele ajuda sosiedade sira nia moris.
Jornalista : Egidio Nono
Editór : Agapito de Deus
