Lafaek News—Povu Japaun Liu Husi Japaun International Cooperation Agency (JICA) iha Timor-leste, Apoiu Kareta Cold Box Pick-up 1 no Twinbird Vaccines Transport Boxes 15 Liu husi SAMES ba iha Ministériu Saúde.
“Povu japaun liu husi JICA Apoiu kareta korente malirin 1 ho box malirin ba iha SAMES, oinsá atu asegura vasina sira iha sentru saúde sira, agora ita nia populasaun 80% mak seidauk hetan vasina, entaun ho ajudus ida ne’e bele garante ona katak vasina sira ne’e sei too ba iha sentru saúde sira atu nune’e ita nia komunidade sira bele hetan vasina,” esplika Vise Ministru Saúde Bonifacio Maucoli Dos Reis, ba jornalista sira iha SAMES, Kampu Alor, Kuarta (30/06/2021).
Nia hatutan, Box malirin ne’e bele uza cok ba iha kareta no mós iha edifisiu sira iha postu saúde ne’ebé mak iha eletrisidade bele karega iha ne’eba, no ho nia temperatura 4 derajat celsius, atu asegura kualidade vasina ba iha area rurais sira.
Iha fatin hanesan, reprezentante JICA iha Timor Leste hatete, laiha ema ida seguru wainhira ema hotu seidauk seguru, hahú kedan iha tinan kotuk ema hotu hasoru pandemia halo estragus no lakon buat barak iha sira nia moris no nasaun barak sente sofre no sistema saúde barak monu tan deit pandemia ne’e, no halo interupsaun hodi fo problema lubun ba prosesu denzenvolvimentu iha Timor-Leste.
“Ita hotu hanesan komunidade boot ida nebe moris hamutuk iha fatin ida, iha ne’ebé ita moris iha rai ida, hemu bee ida no dada iis husi anin ida, ita hotu moris depende ba malu, laiha ema ida mak sei sente haksolok wainhira nia viziñu seluk barak mak sei sofre hela, ohin loron, ita hamutuk iha fatin ne’e ho hanoin atu bele fo saida mak ita iha liu husi ita nia kontribuisaun kiik-oan nudar viziñu atu fo tulun no hadia sistema saúde nian liu-liu iha parte sistema cold chain supply nian iha Timor-Leste, hodi nunee atu bele prepara diak liu hasoru laos deit COVID-19 maibé moras hotu-hotu,” dehan reprezentante JICA ne’e.
JICA mós koko hela atu bele supporta Governu Timor-Leste, liu husi dalan oi-oin, dalan ida ne’ebé simples liu bele halo maka husu sira nia alumni sira iha instituisaun Governu nian atu fahe no kontribui matenek ne’ebé sira hetan durante sira nia treinamentu iha Japaun ba iha sira nia servisu fatin, no JICA hanesan doador sei kontribui baseia ba saída mak importante atu hadia, liu husi JICA nia programa Follow-up Cooperation no liu husi kooperasaun ho JICA nia alumni iha SAMES konsege kontribui kareta Cold Box Pick-up ida ba SAMES no Twinbird Vaccines Transport Boxes 15 ba Servisu Saude Distritu iha Municipiu ida-idak.
“Ami hein katak tulun ida nee bele kontribui hodi hadiak sistema Cold Chain Supply nian iha Timor-Leste no iha valor hodi hasoru COVID-19, ida nee, ami hakarak atu husu atu fasilidade hirak nee bele utiliza no kuidadu ho didiak, atu nune’e bele utiliza ba tempu ne’ebé naruk iha futuru, hodi fo tulun ba ita nia komunidade sira,” nia husu
Reprezentante JICA ne’e dehan tan, ida ne’e la’os kontribuisaun ikus husi JICA, maibé sei kontinua too ema hotu seguru, sira sei nafatin fo tulun ho saida mak sira iha, atu nune’e komunidade bele saudavel no moris diak.
Jornalista : Sandi Belo
Editór : Agapito de Deus
