Manatutu-(Lafaek News)— Komunidade Aldeia Hatu-Conan Suku Lakumesak postu administrativu Laklo, munisipiu Manatutu, orgullu ho prezensa organizasaun Permakultura Timor-Leste ( PERMATIL) ne’ebè Kee Debu prepara no konservasaun bee ba futuru.
“Ha’u reprezenta komunidade no Juventude iha komunidade aldeia ida ne’e, sente orgullu tebes tanbà PERMATIL bele fò oportunidade ba iha aldeia ida ne’e atu kee debu hodi prepara bee iha oin mai atu nune’e jerasaun sira labele triste ba bee ne’ebè agora da-daun ita infrenta, katak Celestino Càrceres ba lafaek News, hafoi remata kee debu iha Hatu-Conan, sábadu 28/11/2020.
Celestino afirma, iha futuru atu nafatin hamutuk ho Joven sira movimentu konservasaun bee nian presiza unidade importante atu nune’e atividade sira ne’e bele susesu.
“Atividade kee debu ne’e susesu duni ami husu Governu bele tau matan atu nune’e bele mellora di’ak liután atividade ida ne’e hodi susesu ba iha komunidade no mòs ba ita nia oan sira iha future,” Celestino subliña.
Iha fatin hanesan Lourenço Bereloco Càrceres nu’udar delegadu aldeia Hatu-Conan, hatete durante tinan tolu nia laran komunidade sira susar tebes ba bee, tanba sunu rai iha fatin ne’e, maibè ho PERMATIL nia programa hatudu sinal katak aban bainrua bee sei la susar ba jerasaun sira.
“Kona-ba atu rai bee, ami sorte teb-tebes tanba ami nia alin sira husi Permatil mai hodi implementa servisu ida ne’e garante katak bele di’ak ba ami komunidade Hatu-Conan, Hatutan Nia”.
Delegadu ne’e husu ba Joven, komunidade no autoridade husi fatin ida ne’e, atu hatete ida ne’e hanesan dalan ida ba ami haree tiha ona serbisu ida ne’e, tan ne’e ba oin bele organiza malu bele kontinua nafatin serbisu ida ne’e la’o ba oin
Jornalista : João da Costa Soares
Editora : Nelya Barros
