Lafaek News—Orgáun Konsellu Imprensa, sesta (10/03/2023), realiza Workshop ba jornalista sira ne’ebé sei halo reportanjen ba eleisaun parlamentar tinan ne’e hodi evita propaganda polítika iha kampania.
Diretor Ezekutivu Konsellu imprensa (KI), Rigoberto Monteiro, afirma, bazeia ba konsellu imprensa lansa mata-dalan reportanjen eleitoral ba eleisaun 2022 iha Dezembru, Konsellu imprensa halo analog ida ba football, kona-ba diskuti bola liu husi Facebook hodi trata malu iha media sosial, situasaun ne’e atu refleta ba situasaun sira agora da-daun iha partidu balun afilia ba partidu seluk hodi trata malu hatun malu.
“KI lansa mata-dalan reportanjen ba eleisoens, iha eleisaun 2022 iha Dezembru, ha’u halo analog ida ba football, momentu ne’ebá iha fulan Novembru nia laran footballl makas loos iha piala dunia, ita diskuti malu jornalista ga sosiedade bai-bain ga estudante ga kona-ba bola makas iha Facebook trata malu at didiak, tau malu didiak tanba ita nia kualker ekipa, situasaun ne’e atu refleta saida refleta persis hanesan kontextu polítiku iha timor, agora dadaun ita hare afialisaun kintu kantu notisia falsu kintu kantu kona-ba polítika eleisaun nian mós tanba ita tama ona tinan eleisaun,” katak Diretor ezekutivu KI, Rigoberto Monteiro iha salaun Delta Nova, Sesta (10/03/2023)
Hodi dehan, KI hala’o workshop ne’e haree ba situasaun hirak ne’ebé atu hasoru liu husi kampaña ne’ebé sei monu iha loron 19 Abríl tinan 2023, atu fo hanoin ba jornalista sira hodi publika notisia balansu ba polítika sira nia propaganda iha palku polítiku.
“Tan ne’e mak ho atu prevene situasaun ne’ebé ita sei hasoru tanba jornalista nia papel ne’e importante atu fornese informasaun ne’ebé balansu halo balansu ba informasaun sira ne’ebé ke ema sira ne’ebé mak fo iha Facebook ka iha media sosial ne’ebé la ho nia faktus la verifika la balansu la independenti buat sira ne’e ho ema ida-idak ho nia pensamentu polítika hakerek iha Facebook la klarifika ba buat ida la klarifika ninia fontes, jornalista nia papel ne’e atu halo balansu ba ida ne’e,” katak Diretor ezekutivu KI
Iha sorin seluk konselleru KI, Espedito Dias, reforsa tan, festa demokrasia mosu da-daun ona hodi hala’o kampaña polítika ba eleisaun parlamentár iha tinan 2023, signifika tinan polítiku no saida mak papel ba festa demokrasia no iha era-dijitál dezenvolvimentu ne’ebé sidadaun la’os sai konsumidor ba informasaun ne’ebé sai husi media konvensional sira, maibé sira mós sai ona produtu rasik ba informasaun ne’ebé la’o iha sosiedade nia laran.
“Ita hotu hatene iha ho evolusaun dezenvolvimentu era dijital ita hotu hatene ho sidadaun sira los ona sai konsumidor ba informasaun ne’ebé sai husi media konvensional sira, maibé sira mós sai ona produtu rasik ba informasaun ne’ebé la’ós iha sosiedade nia laran,” dehan konselleru Espedito Dias.
Observasaun lafaek news nota iha workshop ne’e, hahú iha tuku 8:00, remata iha tuku 16:00 lokraik, iha eventu ne’e partisipa husi reprezentante Comisaun Nasional Eleisoens (CNE) inklui Servisu Tékniku Administrasaun Eleitoral (STAE) inklui ho jornalista sira husi media nasional.
Jornalista : Aniceto Dias
Editor : Agapito de Deus
