Lafaek News—Kuarta-feira, 07 janeiru 2026, Institutu Nasional Combate HIV-SIDA, (INCIDA, IP) hamutuk ho Eskola Coléjiu Saun José Operáriu Balide realiza sensiblizasaun kona-ba prevensaun HIV-SIDA, moras hada’et relasaun sexual iha ámbitu orientasaun estudante foun tinan 2026 nian, iha salaun parókia Balide Dili.
“Virus HIV-SIDA afeita ema barak iha nasaun hotu, inklui Timor mós, la’os feto nakar no mane nakar de’it mak hetan virus ne’e maibé feto no mane inosente mos bele hetan tamba namora sala mane/feto hodi moris hamutuk konserteza hetan Virus ne’e. tan ne’e manorin sira preokupa tebes entaun konvida INCIDA mai eskola Koléjiu Saun José Operáriu hodi hala’o atividade da-uluk tinan 2026 nian, fahe informasaun oinsá mak hetan virus ne’e, oinsa mak evita no prevene HIV-SIDA,” Prezidente INCIDA, Daniel Marçal ba jornalista sira hafoin palestra iha Balide Dili.
Nia haktuir, eskola barak mak seidauk hetan informasaun kona-ba HIV-SIDA, inklui munisipiu sira ho suku barak mak seidauk hetan sensiblizasaun kona ba prevensaun HIV-SIDA ne’e, maibé INCIDA iha ona planu atu kobre hotu eskola no suku sira atu hetan informasaun importante sira ne’e.
“Virus HIV-SIDA afetadu maka’as iha munisípiu Bobonaro, Covalima, Baucau, Ermera no Oé-Cusse. Municipiu sira ne’e iha risku tamba ne’e tenke proteze an tamba aimoruk ba Virus HIV-SIDA seidauk iha,” Nia tenik.
Iha fatin hanesan, Estudante Eskola Coléjiu Saun José Operáriu, Pricia Natalia Clauve Urbano sente kontente tanba bele hetan informasaun kona-ba prevene virus HIV-SIDA, informasaun importante mos ba nia atu bele hadook an husi virus ne’e.
“Ha’u hanesan estudante, ha’u sente kontente no apresia tamba bele hetan informasaun foun. Informasaun ne’e importante tebes tamba bele fo koñesementu mai ami atu prevene an husi Virus oi-oin, liu-liu virus HIV-SIDA ne’ebé la iha ai moruk i perigu ba ema nia vida,” katak Priscia.
Priscia mos husu ba nia maluk eatudante no joven sira prevene an husi relasaun livre atu atu nune’e sai joven ne’ebé personalidade di’ak iha rain rasik.
“Husu ba maluk estudante sira, Virus HIV-SIDA ne’e liu husi relasaun sexual livre tamba ne’e nu’udar joven no estudante prevene no hadook an husi Virus sira, rai-an ho personalidade ne’ebé diak no sai sidadaun ne’ebé diak hodi dezenvolve ita nia nasaun,” estudante ne’e informa.
Sensiblizasaun ba prevensaun Virus HIV-SIDA ne’e hetan partisipasaun másimu husi estudante kandidatura klase VII (siklu da-toluk) no kandidatura klase X (sekundáriu) eskola Coléjiu Saun José Operariu no estudante orientador inklui manorin sira.
Jornalista: Gracia Soares/ Moises Guterres
