Balibo-(Lafaek News)—Autoridade Postu Administrativu Balibo, Casímiro dos Santos, rekoñese komunidade Balibo-vila enfrenta situasaun bee mos durante fulan 4 ona, tan ne’e nia parte sei fo hanoin ba kompania Leohara atu aselera projetu kanalizasaun bele hotu lalais nune’e bele fornese hikas bee mos ba komunidade sira.
“Los durante ne’e komunidade sira infrenta be’e mos tamba agora dadaun projetu kanalizasaun ne’e la’o hela ita pasiénsia ituan karik fulan ida tan itá bele uza ona be’e mos, sira tau ona tanki bee, maibé bee mak menus, kompania nia preukupasaun hodi prejudika projetu la’o tarde, tamba komunidade ne’ebé hela iha estrada sorin atu tau kanalizasaun presija tenki koa alkatraun, maibé kompania sei halo koordenasaun ho nasional hodi husu katak estrada ne’e bele koa ou la’e, tanba tuir informasaun ne’ebe ami hetan katak estrada ne’ebe mak governo halo labele koa,” Casímiro dos Santos ba jornalista sira iha Balibo, 13/10/2025.
Tanba ne’e, autoridade postu administrativu Balibo ne’e husu komunidade Balibo-vila atu pasiensia uituan, hein katak iha fulan oin projetu kanalizasaun bee mos sei remata no populasaun sira sei aseu hikas bee-mos hanesan normal.
Iha fatin hanesan, autoridade postu administrativu Balibo ne’e mos rekoñese iha Balibo suku rua mak seidauk asesu lina eletrisidade, Leo-Hitu ho mos Leo-Lima iha aldeia balu ne’ebe mak seidauk asesu ba lina eletrisidade
“Loos duni, kona ba eletrisidade la’os suku Leo-Lima de’it mak seidauk asesu eletrisidade, maibé suku Leo-Hitu aldeia Aurem ho aldeia Coba, Komunidade balu hela iha ne’ebá mos seidauk asesu eletrisidade, maibé ami koordena ona ho diretor EDTL Munisípiu Bobonaro nian, ne’ebé Diretor EDTL munisípiu haruka ekipa ida ba observa ona, iha parte Leo-lima mos ha’u haree besi-rin ekipa EDTL Lori ba tau ona, Ha’u espera katak tempo badak parte EDTL Sei halo servisu ba liña eletrisidade, ha’u espera komunidade sira ne’ebe seidauk assesu ba Be’e mos no ‘ina eletrisidade nafatin pasiénsia ba hodi hein,” administradór Balibo ne’e sublina.
Kobertura : Ekipa Lafaek News
